మానవాళిపై కరోనా వైరస్ పంజా విసురుతోంది. ప్రపంచవ్యాప్తంగా కరోనా పాజిటివ్ కేసుల సంఖ్య 10లక్షలు(మిలియన్) దాటింది. ఇప్పటివరకు మొత్తం 10,14,256మంది వైరస్ బారినపడ్డారు.
మరోవైపు ప్రపంచవ్యాప్తంగా మృతుల సంఖ్య 50వేలను దాటింది. వైరస్ బారినపడి ఇప్పటివరకు 52వేల 982మంది ప్రాణాలు కోల్పోయారు.
ఒక్క ఐరోపాలోనే 37వేలకుపైగా మంది వైరస్తో మరణించారు. ఇటలీ, స్పెయిన్, ఫ్రాన్స్లో మృతుల సంఖ్య రోజురోజుకు భారీగా పెరుగుతోంది.
సగం జనాభా ఇళ్లల్లోనే...
థాయ్లాండ్లో కరోనా వైరస్ విజృంభిస్తున్న నేపథ్యంలో శుక్రవారం నుంచి ఆ దేశంలో కర్ఫ్యూ అమల్లోకి రానుంది. ఫలితంగా వైరస్ ధాటికి ప్రపంచవ్యాప్తంగా దాదాపు 3.9 బిలియన్ మంది ఇళ్లకే పరిమితమవనున్నారు. 3.9 బిలియన్ అంటే.. ప్రపంచంలోని సగం జనాభాతో సమానం.
వైరస్ కట్టడికి.. దాదాపు 90 దేశాలు ఇప్పటికే లాక్డౌన్, కర్ఫ్యూ పద్ధతులను పాటిస్తున్నాయి.
డెమొక్రాట్ల సదస్సు వాయిదా..
అమెరికా అధ్యక్ష ఎన్నికల ప్రక్రియపైనా వైరస్ ప్రభావం పడేలా కనపడుతోంది. తాజాగా.. తమ అభ్యర్థిని ప్రకటించేందుకు డెమొక్రాట్లు ఏర్పాటు చేసిన సదస్సు.. జులై 13 నుంచి ఆగస్టు 17కు వాయిదా పడింది. ప్రస్తుత పరిస్థితుల్లో సదస్సును వాయిదా వేయడమే శ్రేయస్కరమని డెమొక్రాట్లు భావించారు.
అయితే ఆగస్టు 24-27 మధ్య జరగాల్సిన రిపబ్లికెన్ సదస్సులో ఎలాంటి మర్పులు ఉండబోవని ఆ పార్టీ వర్గాలు తెలిపాయి.
వైరస్తో అమెరికా గడగడలాడుతోంది. ఇప్పటికే కేసుల సంఖ్య 2లక్షలు దాటిపోయింది. మృతుల సంఖ్య కూడా గణనీయంగా పెరుగుతోంది. ముఖ్యంగా న్యూయార్క్ వైరస్ ధాటికి విలవిలలాడుతోంది. మృతదేహాలతో ఆసుపత్రులు, శ్మశానాలు ఇప్పటికే నిండిపోయాయి. దీనితో 'మొబైల్ మార్గ్'ను ఏర్పాటు చేస్తోంది అక్కడి ప్రభుత్వం. దాదాపు 45 మొబైల్ మార్గ్స్లో 3వేల 500 మృతదేహాల వరకు పెట్టవచ్చని ప్రభుత్వ వర్గాలు తెలిపాయి. మరో 85 రిఫ్రిజరేటర్లూ అందుబాటులోకి తీసుకురావడానికి కసరత్తులు చేస్తోంది ప్రభుత్వం.
ఉద్యోగాల కోత...
బ్రిటిష్ ఎయిర్వేయిస్.. సంస్థలోని 60శాతం(28వేలు) మందిని తాత్కాలికంగా విధుల నుంచి తొలగించింది. కరోనా వైరస్ కారణంగా ఈ నిర్ణయం తీసుకున్నట్టు వెల్లడించింది. అయితే ప్రభుత్వ పథకాల ద్వారా.. ఆ 28వేల మందికి 80శాతం జీతాలను అందించనున్నట్టు హామీనిచ్చింది.
ఇదీ చూడండి:- 'నమ్మండి ప్లీజ్... మా దేశంలో ఎవరికీ కరోనా రాలేదు!'
