సంపన్న దేశాలు వాయు ఉద్గారాలను తగ్గించటానికి అనుసరించే మార్గాలు ప్రపంచాన్ని తప్పుదోవ పట్టించే విధంగా ఉన్నాయని స్వీడన్‌కు చెందిన యువ పర్యావరణవేత్త గ్రెటా థన్బర్గ్ ఐక్యరాజ్యసమితి వాతావరణ సదస్సులో వ్యాఖ్యానించారు.
పారిస్ ఒప్పందం ప్రకారం ప్రపంచ ఉష్ణోగ్రతను రెండు డిగ్రీల సెల్సియస్కు పరిమితం చేయటం, 1.5 సెల్సియస్ వరకు అదుపు చేసేందుకు అనుసరించాల్సిన నిబంధనల రూపకల్పనపై స్పెయిన్ రాజధానిలో పలు దేశాలు సమావేశమయ్యాయి. వాతావరణ మార్పుపై పోరాటానికి ఎలా నిధులు సమకూర్చాలి, కార్బన్ ట్రేడింగ్ పథకాలను ఎలా నియంత్రించాలి అనే విషయాలపై చర్చించాయి.
ఈ సందర్భంగా మాట్లాడిన థన్బర్గ్.. పెరుగుతున్న భూతాపాన్ని నియంత్రించేందుకు ప్రపంచ దేశాలు కృషి చేయాలని కోరారు.
"ఇటీవల కొన్ని ధనిక దేశాలు గ్రీన్ హౌస్ వాయువుల ఉద్గారాలను చాలా శాతం తగ్గిస్తామని ప్రతిజ్ఞ చేశాయి. వినడానికి మొదట్లో బాగానే ఉన్నా, వాళ్ల అభిమతం మంచిదే అయినా ఇది తప్పుదోవ పట్టించేలా ఉంది. "
- గ్రెటా థన్బర్గ్, పర్యావరణవేత్త.
పరిశ్రమలు వ్యాపారాలను హరితంగా మార్చి కార్బన్ ఉద్గారాలను కనిష్ఠ స్థాయికి చేర్చేందుకు కృష చేయాలని ఐరాస అధ్యక్షుడు ఆంటోనియో గుటెరస్ కోరారు. 2030 నాటికి ప్రపంచ వ్యాప్తంగా ఉద్గారాలు ప్రతి ఏటా 7.6శాతం తగ్గి ప్రపంచ ఉష్ణోగ్రత 1.5 సెల్సియస్కు చేరేలా చూడాలన్నారు.
2015 నాటి పారిస్ ఒప్పందాన్ని అమలు చేయాలని పదుల సంఖ్యలో సమావేశాలు జరిగినా.. వేలాది మంది నిపుణులు కృషి చేస్తున్నా ఉద్గారాలు ప్రతిఏటా 4శాతం పెరుగుతూ వస్తున్నాయి.
