China Covid Restrictions: చైనాలో మరికొద్ది రోజుల్లో వింటర్ ఓలింపిక్స్ జరగనున్న నేపథ్యంలో కరోనా కట్టడిపై తీవ్రంగా కృషి చేస్తున్నారు అక్కడి అధికారులు. ఒలింపిక్స్ ప్రారంభమయ్యే నాటికి నగరంలో ఒక్క కరోనా కేసు కూడా లేకుండా ఉండేందుకు ప్రయత్నిస్తున్నారు. కానీ వైరస్ వ్యాప్తి మాత్రం కొనసాగుతోంది. బీజింగ్లో కొత్తగా 12 కేసులు నమోదయ్యాయి. దీంతో ఉత్తర బీజింగ్లోని అనేక ఇళ్లను సీజ్ చేశారు. చౌవోయాంగ్ జిల్లాలోని అన్జెన్లీ ప్రాంతంలో కఠిన ఆంక్షలు విధించారు. ఇళ్ల నుంచి ఎవరూ బయటకురావద్దని హెచ్చరికలు జారీ చేశారు.
జీరో టోలరెన్స్ పాలసీని కఠినంగా అమలు చేస్తున్న అధికారులు.. ఓలింపిక్స్ ప్రారంభమయ్యేవరకు ఆ ప్రాంతంలోని ప్రజలకు తరచూ పరీక్షలు నిర్వహించేలా 19 టెస్టింగ్ పాయింట్లను ఏర్పాటు చేయనున్నారు.
ఆ వయసు పిల్లలకు కూడా..
UK Vaccine for Kids: ఒమిక్రాన్ వ్యాప్తి నేపథ్యంలో వ్యాక్సినేషన్ను మరింత ముమ్మరం చేయాలని నిర్ణయించింది యూకే. ఇప్పటికే టీనేజర్లకు, పెద్దలకు విస్తతృంగా టీకాలను పంపిణీ చేస్తుండగా.. తాజాగా 5-11 ఏళ్ల పిల్లలకు కూడా వ్యాక్సిన్లు అందించాలని నిర్ణయించింది.
పిల్లలపైనే కొవిడ్ ప్రభావం తీవ్రంగా ఉంటోందని అందుకే వీరికి వీలైనంత వేగంగా వ్యాక్సిన్లు అందించాలని నిర్ణయించినట్లు అధికారులు వెల్లడించారు. దీర్ఘకాలిక వ్యాధులు, ఇమ్యూనోసప్రషన్, మానసిక సమస్యలు సహా తీవ్రమైన వ్యాధులతో బాధపడుతున్న వారికి కూడా టీకాలు అందించనున్నట్లు తెలిపారు. ఇంగ్లాండ్లో వ్యాక్సిన్కు అర్హులైన పిల్లల సంఖ్య దాదాపు 5 లక్షలుగా ఉందని.. త్వరలోనే వీరికి తొలిడోసు అందిస్తామని చెప్పుకొచ్చారు.
తల్లిదండ్రులు తమ పిల్లలకు టీకా ఇప్పించేందుకు వెనుకాడకూడదని పిలుపునిచ్చారు అధికారులు.
నేపాల్లో కొవిడ్ కలకలం
కరోనా వ్యాప్తి నేపాల్లో కూడా తీవ్రంగా ఉంది. కొత్తగా ఆ దేశంలో 3,540 కేసులు బయటపడ్డాయి. 6,359 మంది కోలుకోగా.. 32 మంది మృతి చెందారు. యాక్టివ్ కేసుల సంఖ్య 83,999గా ఉంది.
ప్రస్తుతం నేపాల్లో కఠిన ఆంక్షలు అమలులో ఉన్నాయి. సినిమా హాళ్లు, రెస్టారెంట్లు, జిమ్లు, లైబ్రరీ వంటి బహిరంగ ప్రదేశాలను మూసివేసింది అక్కడి ప్రభుత్వం.
సంబంధం కోసం వెతుకుతున్నారా? తెలుగు మాట్రిమోనిలో రిజిస్ట్రేషన్ ఉచితం!
ఇదీ చూడండి : ba2 omicron: బీఏ.2 వేరియంట్ కలకలం.. 54 దేశాల్లో కేసులు
