బ్రెగ్జిట్ వ్యూహంపై బ్రిటన్ పార్లమెంట్లో ఘోర పరాభవాన్ని చవిచూశారు ఆ దేశ ప్రధాని బోరిస్ జాన్సన్. ఆరు వారాల క్రితం ప్రధాని బాధ్యతలు చేపట్టిన బోరిస్కు సొంత పార్టీ నుంచే తీవ్ర వ్యతిరేకత ఎదురైంది. కొంతమంది కన్సర్వేటివ్ పార్టీ ఎంపీలు విపక్షాలతో కలిసిపోయారు. దీంతో హౌస్ ఆఫ్ కామన్స్లో బోరిస్కు మెజారిటీ లేకుండా పోయింది.
విపక్షాలతో రెబల్స్ కలిసిపోవడం వల్ల జాన్సన్కు అనుకూలంగా 301 ఓట్లు, వ్యతిరేకంగా 328 ఓట్లు నమోదయ్యాయి. వీరిలో 21మంది ఎంపీలు సొంత ప్రభుత్వానికే వ్యతిరేకంగా ఓట్లు వేశారు. బోరిస్ ఓటమితో ఐరోపా సమాఖ్య నుంచి బ్రిటన్ వైదొలగడం మరింత ఆలస్యమయ్యేలా కనిపిస్తోంది.
బుధవారం మరోమారు ఓటింగ్ జరగనుంది. ఇందులోనూ బోరిస్ గట్టెక్కకపోతే 2020 జనవరి వరకు బ్రెగ్జిట్ పూర్తయ్యే అవకాశాలు తక్కువగా ఉన్నాయి.
బ్రసెల్స్తో ఒప్పందం కుదరకపోతే.. అక్టోబర్ 31న ఐరోపా సమాఖ్య నుంచి వైదొలగడానికి జాన్సన్ రచిస్తున్న ప్రణాళికలకు అడ్డుకట్ట వేసే ప్రక్రియను ప్రారంభించనుంది విపక్షం.
తనకు వ్యతిరేకంగా ఓటు వేసేవారిపై కఠిన చర్యలు చేపడతానని ప్రధాని హెచ్చరించారు. రెబల్స్ను పార్టీ నుంచి బహిష్కరించడానికి సిద్ధంగా ఉన్నట్టు స్పష్టం చేశారు.
ముఖ్యమైన ఈయూ సదస్సుకు ముందు.. అక్టోబర్ 17-18న బ్రిటన్లో ఎన్నికలు జరగనున్నాయి. తాజా పరిణామాల నేపథ్యంలో ముందస్తు ఎన్నికలకు వెళ్లాలని బోరిస్ భావిస్తున్నారు. ఇందుకు తగిన తీర్మానాన్ని ప్రధాని బుధవారం ప్రవేశపెట్టే అవకాశముంది.
"నేనూ ఎన్నికలను కోరుకోవడం లేదు. బ్రెగ్జిట్ను అడ్డుకుని, అర్థరహితంగా జాప్యం సృష్టించడానికి ప్రయత్నిస్తుంటే... ఎన్నికలు ఒక్కటే సమస్యకు పరిష్కారమని అనిపిస్తోంది."
--- బోరిస్ జాన్సన్, బ్రిటన్ ప్రధాని.
కానీ ముందస్తు ఎన్నికల తీర్మానం గట్టెక్కే అవకాశాలు తక్కువగా ఉన్నాయి. హౌస్ ఆఫ్ కామన్స్లో బోరిస్కు సరైన మెజారీటీ లేకపోవడమే ఇందుకు కారణం.
ఇదీ చూడండి- కశ్మీర్ రగడ: మాల్దీవులు వేదికగా పాక్కు భంగపాటు
