జపాన్ తదుపరి ప్రధానమంత్రిగా చీఫ్‌ కేబినెట్‌ సెక్రటరీ యోషిహిడే సుగాకే మద్దతు పలికారు అధికార లిబరల్ డెమొక్రటిక్ పార్టీ నేతలు. ముందు నుంచి అనుకుంటున్నట్లు షింజో అబే వారసుడిగా సుగాకే పట్టం కట్టారు. పార్టీలో అంతర్గతంగా జరిగిన ఓటింగ్లో సుగాను భారీ మెజారిటీతో ఎన్నుకున్నారు.
ప్రధాని కోసం సోమవారం జరిగిన ఈ ఓటింగ్లో యోషిహిడే సుగాకు 377 ఓట్లు వచ్చాయి. ప్రధాని పదవి కోసం పోటీ పడిన ప్రత్యర్థులు ఇరువురికి కలిపి 157 ఓట్లు మాత్రమే రావటం గమనార్హం.
షింజో అబేకు అత్యంత సన్నిహితుడిగానే కాదు, పాలసీ కోఆర్డినేటర్గా, శక్తిమంతమైన నేతగా ఎదిగారు సుగా. అబే విధానాలను ముందుకు తీసుకెళతారని పార్టీతో పాటు దేశ ప్రజల్లోనూ ఆయనపై నమ్మకం ఉంది.
ఈ సందర్భంగా.. తాను సంస్కరణవాదినని, అధికార యంత్రాంగంలోని అడ్డంకులను అధిగమించి పలు రంగాల్లో సంస్కరణలు చేసినట్లు చెప్పారు యోషిహిడే సుగా. జపాన్ పర్యటక అభివృద్ధి, సెల్ఫోన్ బిల్లుల తగ్గింపు, వ్యవసాయ ఉత్పత్తుల ఎగుమతులు పెంచేందుకు కృషి చేశానన్నారు.
ఇదీ చూడండి: భారత్‌కు అబె... ఓ మంచి నేస్తం!
