కరోనాను అడ్డుకునేందుకు ఆ మాస్క్​లే బెస్ట్​..!

నానాటికీ కరోనా వైరస్​ విజృంభిస్తోంది. మహమ్మారి ప్రభావిత దేశాల్లో ఒకటైన హాంకాంగ్​లో ప్రజలు దాని బారిన పడకుండా ఉండేందుకు మాస్క్​లను ధరిస్తున్నారు. మాస్క్​ల వినియోగం ఎక్కవై, ఉత్పత్తి తగ్గింది. ఫలితంగా ధర పెరిగి సామాన్య ప్రజలు మాస్క్​లను కొనుగోలు చేయడం కష్టంగా మారింది. ఆ ఇబ్బందులను తొలగించేందుకు ఆ దేశంలోని ఓ సంస్థ వినూత్న ఆలోచనకు శ్రీకారం చుట్టింది. అందరికీ అందుబాటులో ఉండే విధంగా వస్త్రం, పత్తితో తయారు చేసిన మాస్క్​లను అందుబాటులోకి తీసుకొచ్చింది ఆ సంస్థ.

చైనాలోని వుహాన్​లో పుట్టి ప్రపంచాన్ని వణికిస్తున్న కరోనా వైరస్​ హాంకాంగ్​లోనూ పంజా విసురుతోంది. చైనాకు సమీపంలో ఉన్న హాంకాంగ్​లో ఇప్పటివరకు 67 కేసులు నమోదు కాగా.. ఇద్దరు మరణించారు. ఈ క్రమంలో వైరస్​నుంచి రక్షణ పొందేందుకు మాస్క్​ల వినియోగం ఎక్కువైంది. డిమాండ్​ పెరగడం వల్ల వాటి ధర కూడా అమాంతం పెరిగిపోయింది. దీంతో సామాన్యులు కొనలేని పరిస్థితి నెలకొంది. ఈ నేపథ్యంలో హాంకాంగ్‌లో సామాన్యులకు అందుబాటులో ఉండే విధంగా చౌక ధరకు మాస్క్​లను తయారు చేసేందుకు ముందుకొచ్చింది ది నాన్సెన్స్​ మేకర్స్ అనే థియేటర్​ గ్రూప్.

ది నాన్సెన్స్​ మేకర్స్​కు చెందిన వాలంటీర్లు పత్తితో చేసిన పునర్వినియోగ మాస్క్​లను చేసి అందిస్తున్నారు. ​గ్రూప్ వ్యవస్థాపకులు జో నగై, ఆమె స్నేహితురాలు జెస్సీ హాన్​ థియేటర్ రిహార్సల్​ గదిలో తాత్కాలిక కర్మాగారాన్ని ఏర్పాటు చేసుకొని మాస్క్​లను తయారు చేస్తున్నారు. ఈ మాస్క్​ల తయారీకి అందరికి అందుబాటులో ఉండే పత్తి, వస్త్రాలను వినియోగిస్తున్నారు.

మూడు పొరలు..

పత్తితో తయారు చేసిన మాస్క్​లు మూడు పొరలను కలిగి ఉంటాయి. బయట ఉండే పొర పత్తితోనూ, మధ్యలో ఉండేది నీటిని పీల్చే స్వభావం కలిగి ఉంటుంది. లోపల ఉండే పొర శ్వాస తీసుకోవడానికి సులభంగా ఉండేలా, తేమను పీల్చుకునేలా ఉంటుంది. వినియోగదారులు మరింత రక్షణ కోరుకుంటే.. దీన్ని రెండుగా చేసి మధ్యలో శస్త్రచికిత్సలకు వాడే మాస్క్​లు ఉంచుకోవచ్చు. ఈ మాస్క్​ను శుభ్రపరిచి తిరిగి వాడొచ్చు.

ప్రస్తుతం వైరస్ వ్యాప్తి అధికం కావడం వల్ల మాస్క్​ల వినియోగం పెరిగింది. దీంతో మాస్క్​ల ఉత్పత్తి తక్కువై, డిమాండ్​ పెరిగి ధర మూడింతలు అధికమైంది. సాధారణ ప్రజలకు ఇవి కొనుగోలు చేయాలంటే భారంగా మారింది. ఈ నేపథ్యంలో రోజుకు 400 వరకు పత్తి మాస్క్​లను ఉత్పత్తి చేయాలని ది నాన్సెన్స్​ మేకర్స్ నిర్వాహకులు భావిస్తున్నప్పటికీ తయారీకి అధిక సమయం తీసుకోవడం వల్ల అది సాధ్యం కావడం లేదు. ఇప్పటికే హాంకాంగ్‌లోని ఎన్జీఓ సంస్థలకు కొన్నింటిని పంపిణీ చేశారు. ఎన్జీఓల సహాయంతో త్వరలోనే పేద ప్రజలకు అందించనున్నారు.

" శస్త్ర చికిత్సల మాస్క్​ల కంటే కాటన్ వస్త్రం, పత్తితో తయారు చేసిన ఈ మాస్క్​లు ఎంతో మంచివి. ముందు జాగ్రత్తగా వీటిని ధరించడం మంచి ఆలోచనే. ఈ మాస్క్​ల్లో మధ్యలో శస్త్ర చికిత్సలకు ఉపయోగించే మాస్క్​ను ఉంచడం వల్ల వైరస్​ వ్యాప్తిని అడ్డుకట్ట వేసేందుకు సహాయపడుతుంది. ఈ మాస్క్​ తేమను గ్రహించే లక్షణం కలిగి ఉన్నందున ఎక్కువ కాలం మన్నికగా ఉంటుంది. ఈ మాస్క్​ల తయారీ చాలా మంచి ఆలోచన."

- డాక్టర్​ జోసెఫ్​ త్సాంగ్, అంటువ్యాధుల నిపుణుడు

పత్తితో చేసిన ఈ మాస్క్​లను వైద్య సిబ్బందికి అందించాలని నిర్ణయించుకున్నామని ది నాన్సెన్స్​ మేకర్స్ వ్యవస్థాపకురాలు జో నగై తెలిపారు. హాంకాంగ్​ ప్రజలకు వైరస్​ సోకకుండా తీవ్ర కృషి చేస్తున్న ఫ్రంట్​లైన్​ వైద్య సిబ్బందికి కూడా వీటి అవసరం ఉందని ఆమె అభిప్రాయపడ్డారు. ఎంతో రక్షణతో కూడిన ఈ మాస్క్​లను వారికి అందించేందుకు తీవ్రంగా ప్రయత్నిస్తున్నారు ది నాన్సెన్స్​ మేకర్స్ నిర్వాహకులు.

ఇదీ చదవండి: కరోనా భూతం: చైనాలో మళ్లీ పెరిగిన మృతుల సంఖ్య