దక్షిణ కొరియాపై కరోనా పంజా విసురుతోంది. తాజాగా ఆ దేశంలోని అమెరికా బలగాల్లో ఓ జవానుకు ఈ ప్రాణాంతక వైరస్ సోకినట్లు ఉన్నతాధికారులు ప్రకటించారు. కొరియాలోని అమెరికా సైన్యంలో.. నిర్ధరణ అయిన తొలి కేసుగా పేర్కొన్నారు.
దక్షిణ కొరియాలో కరోనా వ్యాప్తికి ప్రధాన కేంద్రంగా ఉన్న డేగు నగరానికి 30 కిలోమీటర్ల దురంలోని కరోల్ క్యాంప్లో జవానును ఉంచినట్టు అధికారులు తెలిపారు. జవానుకు ప్రత్యేక వైద్యం అందిస్తున్నట్లు వివరించారు.
1,146 మందికి కరోనా
దక్షిణ కొరియాలో కరోనా వైరస్ బారిన పడిన వారి సంఖ్య గణనీయంగా పెరుగుతోంది. తాజాగా మరో 169 మందికి ఈ మహమ్మారి సోకినట్లు కొరియా ప్రభుత్వం ప్రకటించింది. ఇందులో 134 కేసులు డేగు నగరంలోనే నమోదైనట్లు తెలిపింది. మరో 19 కేసులు డేగు సమీప ఉత్తర గ్యాంగసంగ్ రాష్ట్రంలో నమోదయ్యాయి. దేశ వ్యాప్తంగా మొత్తం కరోనా సోకిన వారి సంఖ్య 1,146కి చేరింది. ఇప్పటి వరకు 11 మంది మృతి చెందారు.
పాఠశాలలు బంద్..
కరోనా వ్యాప్తిని నివారించే చర్యల్లో భాగంగా ఇప్పటికే పాఠశాలలను మూసివేసిన కొరియా ప్రభుత్వం.. మరికొన్ని రోజులు తరగతులు రద్దు చేయాలని నిర్ణయించింది. ఏప్రిల్ 20 వరకు ప్లేస్కూల్స్, ప్రాథమిక, ఉన్నత పాఠశాలలను మూసివేసేందుకు ప్రభుత్వం ఆదేశించిందని విద్యాశాఖ ప్రకటించింది. ప్రపంచ ఆరోగ్య సంస్థ, శాస్త్రవేత్తలు హెచ్చరిస్తున్న క్రమంలో ఈ నిర్ణయం తీసుకున్నట్లు పేర్కొంది. అయితే విశ్వవిద్యాలయాల పరీక్షలు కొనసాగుతాయని స్పష్టం చేసింది.
ఇదీ చూడండి:కరోనా ఎఫెక్ట్: నిర్బంధంలో పలు హోటళ్లు
