ఇరాన్తో పెరుగుతున్న ఉద్రిక్తతల నేపథ్యంలో మధ్య ప్రాచ్యంలో వెయ్యి అదనపు దళాలను మోహరించడానికి ఆమోదం తెలిపినట్లు అమెరికా ప్రకటించింది.
మధ్య ప్రాచ్యంలో వాయు, నావికా, భూ-ఆధారిత దాడుల నుంచి రక్షణ పొందడానికి మాత్రమే తమ బలగాలను పంపుతున్నట్లు అమెరికా రక్షణ తాత్కాలిక కార్యదర్శి ప్యాట్రిక్ షానహాన్ వెల్లడించారు.
"ఇటీవల ఇరాన్ దళాలు చేపట్టిన దాడుల గురించి విశ్వసనీయ సమాచారం ఉంది. వారి నిఘా సంస్థల అనుచిత చర్యలు... మధ్య ప్రాచ్యంలో అమెరికా ప్రయోజనాలకు భంగం కలిగించే విధంగా ఉన్నాయి."- ప్యాట్రిక్ షానహాన్, అమెరికా తాత్కాలిక రక్షణ కార్యదర్శి
ఒమన్ గల్ఫ్లో గత వారం రెండు చమురు ట్యాంకర్లపై జరిగిన దాడులకు ఇరాన్దే బాధ్యత అని అమెరికా ఆరోపిస్తోంది. తేహ్రాన్ ప్రత్యారోపణలు నిరాధారమైనవని అంటోంది.
సాక్ష్యాలివిగో..
చమురు ట్యాంకర్లపై దాడులకు ఇరాన్దే బాధ్యత అంటూ సాక్ష్యాధారాలుగా కొన్ని ఫొటోలను అమెరికా రక్షణ కేంద్రం పెంటగాన్ సోమవారం విడుదల చేసింది. 'జపాన్కు చెందిన కొకుకా చమురు ట్యాంకు నుంచి పేలుడు పదార్ధాలను ఇరాన్ సైనికులు తొలగిస్తున్న దృశ్యాలవి' అని వివరించింది. పర్షియన్ గల్ఫ్లో ఈ దాడులను ఇరాన్కు చెందిన 'రివల్యూషనరీ గార్డ్స్' చేసిందని ఆరోపించింది.
విభేదాలు కోరుకోవడం లేదు..
"ఇరాన్తో అమెరికా ఎలాంటి విబేధాలను కోరుకోరుకోవడం లేదు. మధ్య ప్రాచ్యంలో మా సైనికుల భద్రత, సంక్షేమం కోసం, అలాగే అమెరికా ప్రయోజనాల పరిరక్షణ కోసమే అదనపు దళాలను పంపుతున్నాం."- ప్యాట్రిక్ షానహాన్, అమెరికా తాత్కాలిక రక్షణ కార్యదర్శి
ఇరాన్తో 'బహుళ దేశాల అణు ఒప్పందం' నుంచి అమెరికా వైదొలిగినప్పటి నుంచి ఇరుదేశాల మధ్య ఉద్రిక్తతలు పెరిగాయి. ఈ నేపథ్యంలో ఇరాన్పై అమెరికా కఠిన ఆంక్షలు విధించింది. మధ్య ప్రాచ్యంలో తమ దళాలను మోహరించింది. ఇరాన్కు చెందిన ఎలైట్ రివల్యూషనరీ గార్డ్స్ను ఉగ్రవాద సంస్థగా పేర్కొంటూ బ్లాక్ లిస్ట్లో చేర్చింది.
ఇదీ చూడండి: ఈజిప్టు మాజీ అధ్యక్షుడు ముర్సీ హఠాన్మరణం
