'త్వరలో భారీ విస్ఫోటం.. భయాందోళనలో ప్రజలు'

ఫిలిప్పీన్స్​లో విరుచుకుపడుతున్న అగ్నిపర్వతానికి సంబంధించిన ఓ ఫుటేజీని ఫివోల్క్స్​ సంస్థ విడుదల చేసింది. త్వరలో ప్రమాదకర విస్ఫోటం సంభవించే అవకాశం ఉందని హెచ్చరించింది. సమీప ప్రాంతాల్లోని నివాసితులైన వేలాది మందిని పునరావాస కేంద్రాలకు తరలించింది ప్రభుత్వం.

ఫిలిప్పీన్స్​లో తాల్​ అగ్నిపర్వతం బద్ధలైంది. లావా భారీగా ఎగసిపడుతోంది. సంబంధిత టైమ్​లాప్స్ ఫుటేజీని విడుదల చేసింది ఫిలిప్పీన్స్​ ఇన్​స్టిట్యూట్​ ఆఫ్​ వాల్కనోలజీ అండ్ సెసిమాలజీ(ఫివోల్క్స్​) సంస్థ. తాజాగా.. తాల్​ వాల్కనో అకస్మాత్తుగా ఉగ్రరూపం దాల్చింది. దీంతో చుట్టుపక్కల గ్రామస్థులు భయాందోళన చెందుతున్నారు.

లావా కారణంగా 100 కిలోమీటర్ల మేర బూడిద, రాళ్లు ఆకాశంలోకి చిమ్ముకొచ్చాయి. ఈ నేపథ్యంలో మనీలా అంతర్జాతీయ విమానశ్రయాన్ని మూసేశారు. ఫలితంగా 240 విమానాల రాకపోకలకు అంతరాయం ఏర్పడింది. త్వరలో మరో భారీ విస్ఫోటం జరిగే అవకాశం ఉందని ప్రభుత్వ అగ్నిపర్వత- పర్యవేక్షణ సంస్థ భావిస్తోంది. ప్రమాదం పొంచి ఉన్నందున సమీప గ్రామాల్లోని 8 వేల మందిని సురక్షిత ప్రాంతాలకు తరలించింది ప్రభుత్వం.

మెరుపులతో లావా ఉగ్రరూపం..

మరోవైపు టాగెట్టే నగరంలో తాల్​ అగ్ని పర్వతం విస్ఫోటం సమయంలో.. భూమి నుంచి మెరుపులు ఉద్భవించాయి. ఆదివారం సాయంత్రం 6గంటల ప్రాంతంలో మేఘాలు, మెరుపులతో లావా ఉగ్రరూపం దాల్చింది. ఈ ఘటనకు సంబంధించిన వీడియోను అధికారిక మీడియా విడుదల చేసింది.

ఇదీ చూడండి : 'శబరిమల 'రివ్యూ' పిటిషన్లను విచారించట్లేదు'