తాలిబన్ల పాలనను(taliban government) అంతర్జాతీయ సమాజం త్వరలోనే గుర్తిస్తుందని అఫ్గానిస్థాన్ తాత్కాలిక ప్రభుత్వ సమాచార, సాంస్కృతి శాఖ సహాయ మంత్రి, తాలిబన్(Afghanistna Taliban) అధికార ప్రతినిధి జబిహుల్లా ముజాహిద్ ఆశాభావం వ్యక్తం చేశారు. పలు దేశాల ప్రతినిధులు ఇప్పటికే అఫ్గాన్ను సందర్శించారని తెలిపారు. ఈ మేరకు ముజాహిద్ వ్యాఖ్యలను ఖామా ప్రెస్ వెల్లడించింది.
"తమ ప్రభుత్వాన్ని గుర్తించాలని కోరుతూ ఐక్యరాజ్య సమితి అధినేతకు లేఖ రాశాం. ప్రభుత్వానికి గుర్తింపు లభించటం మా హక్కు.. అందుకోసం తాలిబన్ నేతలు ఐరాసతో చర్చిస్తున్నారు."
- జబిహుల్లా ముజాహిద్, తాలిబన్ అధికార ప్రతినిధి.
మహిళలు, మానవ హక్కులను గౌరవించటం(human rights in Afghanistan), సమ్మిళిత ప్రభుత్వాన్ని ఏర్పాటు చేయటం, ఉగ్రవాదానికి అఫ్గాన్(terrorism in afghanistan) వేదిక కాకుండా చూసుకోవాలని అంతర్జాతీయ సమాజం షరతులు విధించింది. వాటిని అమలు చేస్తామని మొదటగా హామీ ఇచ్చినా.. ప్రభుత్వ ఏర్పాటు తర్వాత అవేమీ కనిపించలేదు. మరోవైపు.. రష్యా, అమెరికా, జపాన్, కెనడా, ఫ్రాన్స్, యూకే.. తాలిబన్ ప్రభుత్వాన్ని గుర్తించేది లేదని తేల్చిచెప్పాయి.
పాకిస్థాన్పై ప్రశంసలు..
అంతర్జాతీయంగా ఇస్లామిక్ స్టేట్ ఆఫ్ అఫ్గానిస్థాన్ ప్రభుత్వానికి మద్దతుగా నిలుస్తున్నందుకు పాకిస్థాన్పై ప్రశంసలు కురిపించారు తాలిబన్లు. అఫ్గాన్తో సంబంధాలు కొనసాగించాలని అంతర్జాతీయ సమాజాన్ని పాకిస్థాన్ కోరుతోందని తాలిబన్ ప్రతినిధి జబిహుల్లా ముజాహిద్ తెలిపారు. ' పాకిస్థాన్ మా పొరుగు దేశం. అఫ్గాన్ పట్ల పాకిస్థాన్ వైఖరికి కృతజ్ఞతలు తెలుపుతున్నాం. పాకిస్థాన్లోని పెషావర్తోపాటు ఇతర నగరాలతో రోడ్డు మార్గం ద్వారా అనుసంధానమై ఉంటాం. అఫ్గాన్, పాకిస్థాన్ మధ్య సంబంధాలకు విఘాతం కలిగించే వారిపై కఠిన చర్యలు తీసుకుంటాం. పాకిస్థాన్ సందర్శనకు తాలిబన్ నేతలకు ఆహ్వానం అందితే తప్పకుండా ఆలోచిస్తాం.' అని తెలిపారు.
తాలిబన్లకు ట్విట్టర్ షాక్...
తాలిబన్లకు ప్రముఖ సామాజిక మాధ్యమం ట్విట్టట్ షాక్ ఇచ్చింది. అఫ్గాన్ ప్రభుత్వంలోని పలు మంత్రిత్వ శాఖల ట్విట్టర్ ఖాతాల బ్లూ టిక్ మార్క్ను తొలగించింది. అందులో విదేశాంగ, రక్షణ, అంతర్గత వ్యవహారాల శాఖతో పాటు అధ్యక్ష భవనం, నేషనల్ ప్రొక్యూర్మెంట్ అథారిటీలు ఉన్నాయి. అలాగే.. మాజీ ఉపాధ్యక్షుడు అమ్రుల్లా సలేహ్ ఖాతా బ్లూ టిక్ను తొలగించింది.
మరోవైపు.. అఫ్గాన్ మాజీ అధ్యక్షుడు అష్రాఫ్ ఘనీ, హమిద్ కర్జాయ్, అబ్దుల్లా అబ్దుల్లాల ఖాతాల బ్లూ టిక్ మార్క్ కొనసాగించింది.
ఇదీ చూడండి: సెలూన్లపై ఆ ప్రభుత్వం ఆంక్షలు- షేవింగ్ చేస్తే అంతే!
