కొవిడ్-19, సీజనల్ ఫ్లూ వైరస్ను ఒకే టెస్టుతో గుర్తించేందుకు దక్షిణ కొరియా కొత్త విధానానికి ఆమోదం తెలిపింది. సీజనల్ వ్యాధులు, కొవిడ్ ఉద్ధృతి దృష్ట్యా ఈ నూతన విధానం తీసుకొచ్చామని పేర్కొంది ఆ దేశ ఆరోగ్య శాఖ.
కరోనాను అరికట్టేందుకు ప్రభుత్వం పటిష్టమైన చర్యలు చేపట్టింది. కానీ, శీతాకాలంలో కొవిడ్ ఉద్ధృతి మరింత పెరగనుందని కొందరు నిపుణులు హెచ్చరిస్తున్నారు. ఇప్పటికే ఆర్థికాభివృద్ధి దృష్ట్యా ప్రభుత్వం ఆంక్షలను ఎత్తివేయడం వల్ల ప్రజలు బయట తిరగడం సాధరణమైంది. ఫలితంగా దేశంలో మళ్లీ వైరస్ వ్యాప్తి పెరిగిందని నిపుణులు చెబుతున్నారు.
" ఆరోగ్య శాఖ అధికారులు... కాంటాక్ట్ ట్రేసింగ్ చేస్తూ కొవిడ్ వ్యాప్తిని అరికట్టేందుకు చాలా ప్రయత్నించారు. కానీ, వైరస్ వ్యాప్తి తీవ్రరూపం దాల్చింది".
-యూన్ టేహో, సీనియర్ ఆరోగ్య నిపుణులు.
ఒకే టెస్టులో ఎలా?
సీజనల్ ఫ్లూ, కరోనా వైరస్ను ఒకేసారి గుర్తించేలా ఈ టెస్టు నిర్వహిస్తారు. కొవిడ్ను గుర్తించే పీసీఆర్ టెస్టు మాదిరిగానే ఈ పరీక్ష చేస్తారు. ముక్కు, నోటి నుంచే టెస్టు సాంపిల్స్ తీసుకుంటారు. ఇతర చిన్న వైరస్లను కూడా గుర్తించేలా అధునాతన మిషన్లు ఉపయోగించనున్నారు.
"వ్యాధిగ్రస్థులకు, ఆరోగ్య సేవలందించే వారికి శ్రమను తగ్గించేందుకు ఈ విధానం బాగా ఉపయోగపడుతుంది".
-యూన్.
ప్రస్తుతం దక్షిణ కొరియాలో 26,925 కొవిడ్ కేసులు నమోదయ్యాయి. వైరస్ కారణంగా 474 మంది మృతి చెందారు.
