పాకిస్థాన్లో విషాద ఘటన జరిగింది. బొగ్గు గనిలో గ్యాస్ పేలుడు సంభవించి ఏడుగురు కార్మికులు ప్రాణాలు కోల్పోయారు. బలూచిస్థాన్ రాష్ట్రంలోని ఓ గనిలో ఈ ప్రమాదం సంభవించింది.
హనాయ్ జిల్లా తోర్గఢ్ గనిలో మీథేన్ వాయువు కారణంగా సోమవారం సాయంత్రం ఈ పేలుడు సంభవించినట్లు బలూచిస్థాన్ గని కార్మికుల సమాఖ్య అధ్యక్షుడు సుల్తాన్ మహమ్మద్ లాలా తెలిపారు. గనిలోనుంచి కార్మికుల మృతదేహాలను సహాయక సిబ్బంది వెలికి తీశారని చెప్పారు.
ప్రమాద సమయంలో 1,500 అడుగుల లోతులో కార్మికులు పని చేస్తున్నట్లు సమాచారం. గతవారం బలూచిస్థాన్ మార్వర్లోని ఓ బొగ్గుగనిలో జరిగిన పేలుడులో ఆరుగురు కార్మికులు మృతి చెందారు. ఇన్ని ప్రమాదాలు జరుగుతున్నప్పటికీ.. ప్రభుత్వం, గనుల యజమానులు ఎలాంటి భద్రతా చర్యలు పాటించడం లేదని లాలా ఆవేదన వ్యక్తం చేశారు. బలూచిస్థాన్లో 72 వేర్వేరు ఘటనల్లో 102 మంది కార్మికులు మరణించారని తెలిపారు.
ఇదీ చూడండి:యూనివర్సిటీలో నకిలీ కరెన్సీ నోట్ల ముద్రణ!
