జపాన్లో వారం రోజుల వ్యవధిలోనే రెండో తుపాను విధ్వంసం సృష్టించింది. 'హేషిన్' ధాటికి అనేక ఇళ్లు, భవనాలు ధ్వంసమయ్యాయి. షీబా గ్రామంలో కొండచరియలు విరిగిపడిన ఘటనలో నలుగురు గల్లంతవగా.. వారి కోసం గాలింపు చర్యలు చేపట్టినట్లు అధికారులు తెలిపారు. క్యూషు ప్రాంతంలో మరో 37 మందికి తీవ్ర గాయాలైనట్లు ఆ దేశ మీడియా పేర్కొంది.
తుపాను ప్రభావిత ప్రాంతాల్లోని ప్రజలను పునరావాస కేంద్రాలకు తరలించారు. తుపాను ధాటికి అనేక చెట్లు నేలకొరిగాయి. విద్యుత్ సేవలకు అంతరాయం ఏర్పడి కొన్ని ప్రాంతాలు అంధకారంలో ఉన్నాయి.
గంటకు 144 కిలోమీటర్ల వేగంతో దక్షిణ కొరియా ఆగ్నేయ తీరం వైపు తుపాను కదులుతోంది. హేషిన్ ధాటికి జపాన్ దక్షిణ ద్వీపంలో భారీ నష్టం సంభవించింది. రాకాసి అలలు తీరంపై విరుచుకు పడుతున్నాయి. గత వారం మేసాక్ తుపాను వల్ల పలువురుకి గాయాలవగా...అనేక భవనాలు, ఇళ్లు ధ్వంసమయ్యాయి.
ఇదీ చూడండి: అమెరికాలో ఆగని కార్చిచ్చు- వేల ఎకరాలు దగ్ధం
