ప్రపంచంపై కరోనా పంజా కొనసాగుతోంది. ఇప్పటివరకు 6,09,08,673 కేసులు బయటపడ్డాయి. మొత్తం మీద 14,30,367 మంది కరోనాకు బలయ్యారు. బ్రిటన్లో కేసులు ఆందోళనకరంగా పెరుగుతున్నాయి.
| దేశం | కేసులు | మృతులు |
| అమెరికా | 1,31,47,864 | 2,68,404 |
| బ్రెజిల్ | 61,66,898 | 1,70,799 |
| రష్యా | 21,87,990 | 38,062 |
| ఫ్రాన్స్ | 21,70,097 | 50,618 |
| స్పెయిన్ | 16,22,632 | 44,037 |
| బ్రిటన్ | 15,57,007 | 56,533 |
| ఇటలీ | 14,80,874 | 52,028 |
| అర్జెంటీనా | 13,90,388 | 37,714 |
| కొలంబియా | 12,70,991 | 35,860 |
బ్రిటన్లో..
పెరుగుతున్న కేసుల నేపథ్యంలో టైర్-2 కరోనా నియంత్రణ వ్యవస్థలోకి బ్రిటన్లోని అనేక ప్రాంతాలు జారుకోనున్నాయి. వీటిల్లో దేశ రాజధాని లండన్ కూడా ఉంది. డిసెంబర్ 2తో ముగియనున్న లాక్డౌన్ తర్వాత కూడా దేశం హైఅలర్ట్లో ఉండనుంది.
సూడాన్ మాజీ ప్రధాని మృతి..
సూడాన్ మాజీ ప్రధాని సాదిక్ అల్-మహ్ది.. కరోనా కారణంగా మృతిచెందారు. యూఏఈలో చికిత్స పొందుతున్న ఆయన 84ఏళ్ల వయస్సులో తుదిశ్వాస విడిచారు. సూడాన్లో ప్రజాస్వామ్యబద్ధంగా ఎన్నుకున్న చివరి ప్రధానిగా, దేశంలో అతిపెద్ద రాజకీయ పార్టీకి నాయకత్వం వహించిన నేతగా ఆయన గుర్తింపు పొందారు.
పాకిస్థాన్లో..
పాకిస్థాన్ విపక్షంలోని ముఖ్య నేత, పాకిస్థాన్ పీపుల్స్ పార్టీ చీఫ్ బిలావల్ భుట్టో జర్దారీకి కరోనా పాజిటివ్గా తేలింది. ఆయన ప్రస్తుతం ఐసోలేషన్లో ఉన్నారు.
