Russia fines Google: రష్యాలోని మాస్కో కోర్టు సెర్చ్ ఇంజిన్ దిగ్గజం గూగుల్కు దాదాపు 100 మిలియన్ డాలర్ల (దాదాపు రూ. 750 కోట్లు) జరిమానా విధించింది. స్థానిక చట్టాల ప్రకారం నిషేధిత కంటెంట్ను డిలీట్ చేయనుందుకు గానూ ఇంత పెద్ద మొత్తంలో ఫైన్ చెల్లించాలని ఆదేశించింది. టగన్ స్కై జిల్లా కోర్టు ఈ మేరకు ఆదేశాలు జారీ చేసింది. పదే పదే చెప్పినా కంటెంట్ను తొలగించకుండా గూగుల్ నిర్లక్ష్యంగా వ్యవహరించిందని పేర్కొంది.
కోర్టు ఆదేశాలను వివరంగా చదివి తర్వాత ఏం చేయాలో ఆలోచిస్తామని గూగుల్ ఓ ప్రకటనలో తెలిపింది.
సామాజిక మాధ్యమాల్లో డ్రగ్స్, ఆయుధాలు, పేలుడు పదార్థాలకు సంబంధించి కంటెంట్ను తొలగించాలని రష్యా ప్రభుత్వం ఒత్తిడి తెస్తోంది. విదేశీ టెక్ సంస్థలు రష్యా పౌరుల డేటాను తమ దేశంలోని సర్వర్లలోనే భద్రపరచాలని ఇప్పటికే తేల్చి చెప్పింది. స్థానిక చట్టాలను టెక్ సంస్థలు పాటించాల్సిందేనని స్పష్టం చేసింది. రష్యా ఈ ఏడాదిలో ఇప్పటికే గూగుల్, ఫేస్బుక్, ట్విట్టర్ సంస్థలకు జరిమానాలు విధించింది. అయితే ఇంత పెద్ద మొత్తంలో ఫైన్ చెల్లించమనడం మాత్రం ఇదే తొలిసారి.
రష్యాలో గూగుల్ కార్యకలాపాలు మాత్రం యథావిధిగా కొనసాగించుకోవచ్చని ప్రభుత్వం స్పష్టం చేసింది. చట్టాలను మాత్రం కచ్చితంగా పాటించాల్సిందేనని పేర్కొంది.
ఇదీ చదవండి: బైడెన్ కీలక నిర్ణయం- ఆ దేశాలపై ప్రయాణ ఆంక్షలు ఎత్తివేత
