జీ-20 అత్యవసర శిఖరాగ్ర సమావేశం నేపథ్యంలో రష్యా అధ్యక్షుడు వ్లాదిమిర్ పుతిన్తో ఫోన్లో సంభాషించారు భారత ప్రధాన మంత్రి నరేంద్ర మోదీ. కరోనా మహమ్మారి విజృంభిస్తోన్న తరుణంలో.. వైరస్ను అరికట్టేందుకు తీసుకోవాల్సిన చర్యలపై ఇరువురూ చర్చించారు.
ప్రపంచం ఎదుర్కొంటున్న సంక్షోభాన్ని పరిష్కరించటంలో అంతర్జాతీయ సహకారం తప్పనిసరి అని పేర్కొన్నారు మోదీ, పుతిన్. ఈ సందర్భంగా ప్రపంచదేశాల ప్రాముఖ్యాన్ని నొక్కి చెప్పారు. ద్వైపాక్షిక సంబంధాలను మరింత బలోపేతం దిశగా కృషి చేయాలని నిర్ణయించారు.
వారు త్వరగా కోలుకోవాలి..
కరోనాపై చర్చించేందుకు జీ-20 సమావేశం ఒక చక్కని వేదిక అని, సదస్సు కోసం ఎదురుచూస్తున్నట్లు తెలిపారు మోదీ. రష్యాలో కొవిడ్ బారిన పడిన వారు త్వరగా కోలుకోవాలని ఆకాంక్షించారు.
కరోనాపై పోరాడేందుకు పుతిన్ నేతృత్వంలో ఆ దేశం చేస్తోన్న ప్రయత్నాలు సఫలం అవుతాయని విశ్వాసం వ్యక్తం చేశారు. కొవిడ్-19ను ఎదుర్కొనేందుకు భారత్ తీసుకున్న చర్యల పట్ల పుతిన్ సంతృప్తి వ్యక్తం చేశారు.
వీసీలో జీ-20
భారత్తో సహా ప్రపంచదేశాలను అతలాకుతలం చేస్తోన్న కరోనా వైరస్ నియంత్రణపై చర్చించేందుకు నేడు జీ-20 దేశాల అధినేతలు సమావేశం కానున్నారు. వీడియో కాన్ఫరెన్స్ ద్వారా నిర్వహించే సమావేశంలో ప్రధాని నరేంద్రమోదీ పాల్గొననున్నారు.
