ఫైనాన్షియల్ యాక్షన్ టాస్క్ఫోర్స్ (ఎఫ్ఏటీఎఫ్) గ్రే లిస్ట్ నుంచి బయటపడేందుకు తప్పని పరిస్థితుల్లో ఉగ్రవాదులపై చర్యలు చేపడుతోంది పాకిస్థాన్. ఇప్పటికే దావూద్ ఇబ్రహీంను ఉగ్రజాబితాలో చేర్చిన పాక్ తాజాగా.. లష్కరే తోయిబా వ్యవస్థాపకుడు హఫీజ్ సయీద్ సన్నిహితుల్లో ముగ్గురిపై చర్యలు తీసుకుంది.
ముగ్గురిని ఉగ్రవాద నిధుల సమీకరణ నేరాల్లో దోషులగా తేల్చింది లాహోర్ హైకోర్టు. ముగ్గురిలో మలిక్ జాఫర్ ఇక్బాల్, అబ్దుల్ సలాం భట్వీలకు ఐదేళ్ల జైలు శిక్ష, మూడో ఉగ్రవాది అద్దుల్ రెహ్మాన్ మక్కీకి 18 నెలల శిక్ష ఖరారు చేసింది. ఈ మేరకు పాకిస్థాన్ తీవ్రవాద నిర్మూలన విభాగం వివరాలు వెల్లడించింది. ఈ ముగ్గురు ఉగ్రవాదులు సయీద్ ఛారిటీ సంస్థలైన జమాత్ ఉద్ దవా, ఫలాహ్ ఈ ఇన్సానియత్లకు నిధులు సమకూర్చుతున్నారని తేలినట్లు వివరించింది.
ఉగ్రవాదానికి ఆర్థిక సాయం కేసులో దోషిగా తేలిన తర్వాత.. హఫీజ్ సయీద్ ఈ ఏడాది ఫిబ్రవరి నుంచి జైలు శిక్ష అనుభవిస్తున్నాడు. సయీద్కు ఐదున్నరేళ్ల జైలు శిక్ష పడింది.
ఇదీ చూడండి: ఉగ్రవాదులపై పాక్ కొరడా- 88 సంస్థలపై కఠిన ఆంక్షలు
