భారత్ నుంచి పోలియో మార్కర్లను దిగుమతి చేసుకోవాలని నిర్ణయించింది పాకిస్థాన్. ఈ మేరకు ఆ దేశ ఫెడరల్ కేబినేట్ వన్-టైమ్ అనుమతులు ఇచ్చినట్లు పాక్కు చెందిన ఓ వార్తా సంస్థ వెల్లడించింది. జమ్ముకశ్మీర్ విభజన, అధికరణ 370 రద్దు చేసిన కొన్ని నెలల్లోనే పాకిస్థాన్ తన మొండి వైఖరి నుంచి వెనక్కి తగ్గింది. అన్ని రకాల వాణిజ్య సంబంధాలను తెంచుకున్న పాక్.. ఔషధాల దిగుమతిలో ఆచితూచి అడుగులు వేస్తోంది.
" భారత్ నుంచి పోలియో మార్కర్ల దిగుమతికి వన్-టైమ్ అనుమతి ఇవ్వాలని ఫెడరల్ కేబినేట్ నిర్ణయం తీసుకుంది. భారత్ నుంచి మందుల దిగుమతిపై నిషేధం ఎత్తివేయాలని ఆ దేశ ఔషధ పరిశ్రమ డిమాండ్ చేస్తోంది. లేకపోతే కొన్ని వారాలలో పాకిస్థాన్ తీవ్ర మందుల కొరత, ముఖ్యంగా ప్రాణాలను రక్షించే ఔషధాల సంక్షోభాన్ని ఎదుర్కొంటుందని హెచ్చరించింది. దాని పర్యవసానంగా భారత్ నుంచి మందులు, ముడి పదార్థాల దిగుమతిపై నిషేధాన్ని గత సెప్టెంబర్లో ఎత్తివేసింది పాక్."
- పాక్ మీడియా సంస్థ
మార్కర్లు ఎందుకు?
ప్రపంచ ఆరోగ్య సంస్థ (డబ్ల్యూహెచ్ఓ) ఆమోదిత పోలియో వాక్సిన్ను చిన్నారులకు అందించిన అనంతరం వారి వేలికి మార్కర్లతో గుర్తు పెడతారు. పోలియో చుక్కలు వేసే క్రమంలో పిల్లలు కొంత మేర ఇంకును మింగే అవకాశం ఉన్నందున విషపూరితం కాని మార్కర్ల దిగుమతి అవసరమని పాకిస్థాన్ పోలియో అత్యవసర సేవల కేంద్రం జాతీయ కోఆర్డినేటర్ డాక్టర్ రాణా సఫ్దార్ తెలిపారు.
భారత్, చైనాలోనే..
చిన్నారులు ఇంకును మింగినా.. విషపూరితంకాని మార్కర్లు తయారీ చేసే డబ్ల్యూహెచ్ఓ ఆమోదిత సంస్థలు భారత్, చైనాలో మాత్రమే ఉన్నాయి. పాక్ కోసం డబ్ల్యూహెచ్ఓ మార్కర్లను సేకరిస్తోంది. గతంలో చైనా నుంచి కొనుగోలు చేసినప్పటికీ.. నాణ్యత విషయంలో తేడా వచ్చి భారత్ నుంచి తీసుకోవాలని నిర్ణయించింది. వాణిజ్యంపై పాక్ నిషేధం విధించక ముందే భారత్ నుంచి 8 లక్షల మార్కర్లు సేకరించాలని డబ్ల్యూహెచ్ఓ నిర్ణయించింది. కానీ.. నిషేధం వల్ల పంపిణీ కాలేదు. ప్రస్తుతం నిషేధం ఎత్తివేస్తూ నిర్ణయం తీసుకున్నందున పాక్కు మార్కర్లు చేరనున్నాయి.
104 కేసుల గుర్తింపు..
పాకిస్థాన్ సహా అఫ్గానిస్థాన్, నైజీరియాలో పోలియో లక్షణాలు ఇంకా ఉన్నాయి. ఈ ఏడాది పాకిస్థాన్లో 104 పోలియో కేసులు నమోదయ్యాయి. దేశంలోని 33 జిల్లాల్లో సుమారు 6.75 మిలియన్లకు పైగా చిన్నారులకు పోలియో వాక్సిన్ పంపిణీ ఈనెలలోనే ప్రారంభించింది పాక్. 1994 నుంచి పోలియోను నిర్మూలించేందుకు చర్యలు చేపట్టింది.
ఇదీ చూడండి: మరోసారి పాక్ దుర్నీతి.. భారత సైన్యాధికారి వీరమరణం
