పాకిస్థాన్ మరోమారు తన వక్రబుద్ధిని బయటపెట్టింది. కశ్మీర్ అంశంపై మళ్లీ జోక్యం చేసుకుంది. ఈసారి ఏకంగా భారత ప్రభుత్వంపై విషం కక్కింది. కశ్మీర్లో భారత ప్రభుత్వం మానవహక్కుల ఉల్లంఘనకు పాల్పడుతోందంటూ.. పలు పత్రాలను విడుదల చేసింది.
ఇస్లామాబాద్లో జరిగిన మీడియా కాన్ఫరెన్స్లో 131పేజీలతో కూడిన ఈ డాక్యుమెంట్ను విడుదల చేశారు పాక్ విదేశాంగ మంత్రి మహమ్మద్ ఖురేషీ, జాతీయ భద్రతా సలహాదారు యూసఫ్. భారత నిజస్వరూపాన్ని బయటపెట్టేందుకు నిర్ణయించుకున్నట్టు ఖురేషీ ఈ కార్యక్రమంలో వ్యాఖ్యానించారు.
"ప్రపంచంలోనే అతిపెద్ద ప్రజాస్వామ్య దేశంగా భారత్ గొప్పలు చెప్పుకుంటోంది. కానీ భారత ప్రభుత్వం నిజస్వరూపాన్ని బయటపెట్టాలని మేము నిర్ణయించుకున్నాము. అందుకే కశ్మీర్పై ఈ పత్రాలను రూపొందించాము. 26అంతర్జాతీయ, 14 పాకిస్థాన్ మీడియా రిపోర్టుల నుంచి సేకరించిన 113 ఘటనలను ఇందులో పొందుపరిచాము. కశ్మీర్లో మానవ హక్కుల ఉల్లంఘన జరుగుతున్నట్టు ఇవి స్పష్టం చేస్తాయి. ఐరాసతో పాటు అంతర్జాతీయ సమాజానికి ఈ పత్రాలను పంపిస్తాము."
- మహమ్మద్ ఖురేషీ, పాక్ విదేశాంగమంత్రి
కశ్మీర్ తమ దేశ అంతర్గత వ్యవహారమని భారత్ ఎన్నిసార్లు చెప్పినా.. పాకిస్థాన్ జోక్యం చేసుకుంటూనే ఉంది. భారత వ్యతిరేక కార్యకలాపాలకు ముగింపు పలికి.. వాస్తవాలను అర్థం చేసుకోవాలని అనేకమార్లు హితవు పలికినా.. పాక్ పట్టించుకోవడం లేదు. అంతేకాకుండా.. కశ్మీర్ ప్రజలపై భారత్ రసాయన ఆయుధాలను ప్రయోగిస్తోందని తాజాగా ఆరోపించింది.
కశ్మీర్ స్వయంప్రతిపత్తిని రద్దు చేస్తున్నట్టు 2019 ఆగస్టు 5న భారత ప్రభుత్వం ప్రకటించినప్పటి నుంచి ఇరు దేశాల మధ్య ఉద్రిక్త వాతావరణం నెలకొంది. అప్పటి నుంచి భారత్కు వ్యతిరేకంగా పాక్ ఆరోపణలు చేస్తూనే ఉంది.
ఇదీ చదవండి: Taliban Government: తాలిబన్ల ప్రభుత్వం కూర్పులో పాకిస్థాన్ హస్తం!
