బాలాకోట్పై భారత వైమానిక దళం జరిపిన దాడుల్లో ఎలాంటి నష్టం జరగలేదని మరోసారి బుకాయించింది పాకిస్థాన్ సైన్యం. ఈ విషయంలో భారత్ పదేపదే అసత్యాలు ప్రచారం చేస్తోందని ఆరోపించింది. నిజానిజాలు తెలుసుకునేందుకు భారత పాత్రికేయులెవరైనా బాలాకోట్కు వస్తే వారిని సన్మానిస్తామని ప్రకటించింది.
పాకిస్థాన్ రావల్పిండిలో నిర్వహించిన పాత్రికేయుల సమావేశంలో ఈ వ్యాఖ్యలు చేశారు పాక్ సైన్యం అధికార ప్రతినిధి మేజర్ జనరల్ ఆసిఫ్ గఫూర్. పాకిస్థాన్ చేసిన ఎదురుదాడిలో ఏం జరిగిందో భారత్ చెప్పడం లేదని గఫూర్ ఆరోపించారు. పాక్ తన తీరును మార్చుకోవాలని మమ్మల్ని కోరే బదులు పాక్పై భారత్ తన తీరును మార్చుకోవాలన్నారు.
"గత రెండు నెలలుగా భారత్ అబద్ధాలాడుతూనే ఉంది. ఓ బాధ్యత గల దేశంగా మేము అలాంటి అసత్య వార్తలకు స్పందించం. నిజమేంటంటే పుల్వామాలో సైనికులపై దాడి జరిగింది. బాలాకోట్లో మాత్రం ఎలాంటి నష్టం జరగలేదు. స్థానిక, విదేశీ మీడియాను అక్కడికి తీసుకెళ్లి నిజాలేంటో భారత్కు చూపిస్తాం. ఒకవేళ భారత పాత్రికేయులు కూడా బాలాకోట్కు రావాలని భావిస్తే వారిని మేము సన్మానిస్తాం."
- మేజర్ జనరల్ ఆసిఫ్ గఫూర్, పాక్ సైన్యం అధికార ప్రతినిధి
