నిషేధం విధించిన సంస్థలపై కఠిన చర్యలు అమలు చేయకుంటే పాక్కు ఇబ్బందులు తప్పవని హెచ్చరించారు పాకిస్థాన్ ఆర్థిక కార్యదర్శి ఆరిఫ్ అహ్మద్ ఖాన్. అంతేకాక 'ఎఫ్ఏటీఎఫ్' సిఫార్సులన్నింటినీ వెంటనే అమలు చేయాలన్నారు. 'ఫైనాన్షియల్ యాక్షన్ టాస్క్ ఫోర్స్' నుంచి ఆర్థిక సహకారం ఆగిపోకూడదంటే పాక్ వెంటనే సిఫార్సులు అమలు చేయాలన్నారు.
ప్యారిస్ కేంద్రంగా ఉన్న అంతర్జాతీయ టెర్రర్ వాచ్ డాగ్ 'ఎఫ్ఏటీఎఫ్' గత ఏడాది పాక్కు 40 సిఫార్సులు చేసింది. 'గ్రే లిస్ట్' నుంచి పాక్ను తొలగించేందుకు ఈ సిఫార్సులను అమలు చేయాలని తెలిపింది. అలా చేయకపోతే పాక్ను బ్లాక్ లిస్టులో చేరుస్తామని హెచ్చరించింది.
ప్రజా పద్దుల కమిటీ(పీఏసీ)కి చెందిన ఉప కమిటీ సమావేశంలో ఆరిఫ్ మంగళవారం పాల్గొన్నారు. ఈ సందర్భంగా మీడియాతో మాట్లాడిన ఆయన పలు వివరాలు వెల్లడించారు.
⦁ నిర్దేశించిన గడువులోగా సిఫార్సులు అమలు చేయకపోయినా, వీటిని పట్టించుకోక పోయిన పాక్కు 'ఎఫ్ఏటీఎఫ్' నుంచి వచ్చే నిధులు ఆగిపోవచ్చని ఆరిఫ్ అన్నారు.
⦁ 'ఎఫ్ఏటీఎఫ్'కు చెందిన అంతర్జాతీయ సహకార సమీక్ష గ్రూపు(ఐసీఆర్జీ) ఇటీవలి సమావేశంలో ఉగ్రవాదంపై పాకిస్థాన్ కార్యచరణ ప్రణాళికను సమీక్షించింది. సమీక్షలో పాక్ పనితీరుపై గ్రూపు అసంతృప్తి వ్యక్తం చేసింది.
⦁ ఒక వేళ పాక్ 'ఎఫ్ఏటీఎఫ్' సిఫార్సుల అమలు చేయలేకపోతే ఆర్థికంగా ఇబ్బంది ఎదుర్కోక తప్పదని మరోసారి స్పష్టం చేసింది. ఇలాంటి కారణాలతోనే ఉత్తర కొరియా, ఇరాన్లు బ్లాక్ లిస్ట్లో ఉన్నాయి.
⦁ ప్రస్తుతం 'ఎఫ్ఏటీఎఫ్'లో 35 మంది సభ్యులున్నారు. యూరోపియన్ కమిషన్, గల్ఫ్ సహకార మండలి అనే రెండు అనుబంధ సంస్థలు 'ఎఫ్ఏటీఎఫ్'కు ప్రాంతీయ భాగస్వాములుగా ఉన్నాయి.
