అధికార దుర్వినియోగం, అవినీతి ఆరోపణలు ఎదుర్కొంటున్న పాకిస్థాన్ మాజీ ప్రధాని నవాజ్ షరీఫ్... సెప్టెంబరు 10వ తేదీ లోపు న్యాయస్థానం ముందు హాజరుకావాలని ఇస్లామాబాద్ హైకోర్టు ఆదేశించింది. నవాజ్కు ఇదే చివరి అవకాశంగా కోర్టు తెలిపింది. ఈ మేరకు ఆ దేశ మీడియా వెల్లడించింది.
"కోర్టు ముందు హాజరుకావడానికి నవాజ్ షరీఫ్కు చివరి అవకాశం ఇస్తున్నాం. ఏదేమైనా ఈనెల 10లోపు తప్పనిసరిగా ధర్మాసనం ముందు హాజరవ్వాలి."
-న్యాయస్థానం
షరీఫ్కు అల్-అజీజియా స్టీల్ మిల్స్ కేసులో ఏడేళ్లు జైలు శిక్ష విధించింది లాహోర్ హైకోర్టు. అయితే గతేడాది నవంబరులో గుండె సంబంధిత వ్యాధితో బాధపడుతున్న షరీఫ్కు వైద్య చికిత్స కోసం నాలుగు వారాలపాటు లండన్‌ వెళ్లేందుకు లాహోర్ హైకోర్టు అనుమతిచ్చింది. అప్పటి నుంచి నవాజ్ అక్కడే తలదాచుకుంటున్నారు. గతేడాది డిసెంబరులోనే గడువు ముగిసినప్పటికీ తిరిగి స్వదేశానికి రాకపోవడం వల్ల షరీఫ్ పరారీలో ఉన్నట్లు అధికారికంగా ప్రకటించింది పాక్. ఈ మేరకు తమకు అప్పగించాలని బ్రిటన్ ప్రభుత్వానికి విన్నవించింది.
ఇదీ చూడండి: రష్యాలో 10 లక్షలు దాటిన కరోనా కేసులు
