పాక్ ఆక్రమిత కశ్మీర్లోని స్కర్దులో చైనా విమానం ఉన్నట్లు ఇటీవల వచ్చిన వార్తలు అవాస్తవమని బుకాయించే ప్రయత్నం చేసింది పాకిస్థాన్. పీఓకేలోని నియంత్రణ రేఖ వద్ద 20 వేల మంది సైనికుల్ని మోహరించినట్లు వస్తున్న వార్తలనూ తోసిపుచ్చింది. అవన్నీ అవాస్తవమని, నిరాధారమైన కథనాలని పేర్కొంది.
పాక్లో చైనా బలగాలు ఉన్నాయన్న వార్తలను ట్విట్టర్ వేదికగా తీవ్రంగా ఖండించింది పాక్ సైన్యం మీడియా విభాగం. పీఓకేలోని స్కర్దు వైమానిక స్థావరాన్ని చైనా వినియోగించుకుంటుందన్న వార్తలనూ తోసిపుచ్చింది.
" గిల్గిత్ బాల్టిస్థాన్లోని ఎల్ఓసీ వెంబడి అదనపు బలగాలను మోహరించటం సహా స్కర్దు ఎయిర్బేస్ను చైనా వినియోగించుకోవటం అనేది పూర్తిగా అవాస్తవం. అలాంటి అదనపు బలగాల మోహరింపులు జరగలేదు. పాక్లో చైనా బలగాలు ఉన్నాయన్న వార్తలను తీవ్రంగా ఖండిస్తున్నాం."
- మేజర్ జనరల్ బాబార్ ఇప్తిఖార్, పాక్ సైన్యం
తూర్పు లద్దాఖ్లోని గల్వాన్ లోయలో భారత్-చైనా మధ్య ఉద్రిక్తతల నేపథ్యంలో పీఓకేలోని ఎల్ఓసీ వెంబడి పాక్ 20వేల అదనపు బలగాలను మోహరించినట్లు ఇటీవల వార్తలు వచ్చాయి. తూర్పు ప్రాంతంలోని వాస్తవాధీన రేఖ వెంబడి చైనా మోహరించిన బలగాలకు సమానమైన సంఖ్యగా పేర్కొన్నాయి. అది బాలాకోట్ వైమానిక దాడుల తర్వాత పాక్ మోహరించిన బలగాలకన్నా అధికమని వెల్లడించాయి.
ఇదీ చూడండి: పీవోకేలో చైనా విమానం- సరిహద్దులో భారీగా బలగాలు
