Omicron survival on surfaces: ఒమిక్రాన్ వేరియంట్ వేగంగా వ్యాప్తి చెందుతూ ప్రపంచాన్ని గడగడలాడిస్తోంది. రోజుకు లక్షల మందికి అంటుకుంటోంది. ఇందుకు ప్రధాన కారణం.. పలు ఉపరితలాలపై ఎక్కువ కాలం సజీవంగా ఉండటమేనని చెబుతోంది ఓ అధ్యయనం. కరోనా వైరస్ ఇతర రకాలతో పోల్చితే ఒమిక్రాన్ వేరియంట్.. మనుషుల చర్మంపై 21 గంటలకుపైగా, ప్లాస్టిక్ వస్తువులపై 8 రోజులకుపైగా జీవించి ఉంటోందని తేల్చింది.
జపాన్లోని క్యోటో ప్రిఫెక్చురల్ యూనివర్సిటీ ఆఫ్ మెడిసిన్కు చెందిన పరిశోధకులు.. వుహాన్లో ఉద్భవించిన సార్స్ కోవ్-2 వైరస్తో ఇతర అన్ని వేరియంట్లను పోల్చి చూశారు. అవి పర్యావరణంలో సజీవంగా ఉండే సామర్థ్యాన్ని పరిశీలించారు. ఇతర రకాల కన్నా.. ఒమిక్రాన్ వేరియంట్కు ఎక్కువ కాలం జీవించే సామర్థ్యం ఉందని తేల్చారు.
వూహాన్లో బయటపడిన రకంతో పోల్చితే.. ఆల్ఫా, బీటా, డెల్టా, ఒమిక్రాన్ వేరియంట్లకు ప్లాస్టిక్, చర్మంపై జీవించేందుకు రెండింతల సామర్థ్యం ఉన్నట్లు నిర్ధరించారు. ఈ అధ్యయనం బయోఆర్షివ్లో ఇటీవలే ప్రచురితమైంది.
"పర్యావరణంలో ఎక్కువ కాలం జీవించే సామర్థ్యమే.. వైరస్ వ్యాప్తి ఎక్కువగా ఉండేందుకు కారణమవుతోంది. ఇతర వేరియంట్లతో పోల్చితే ఈ సామర్థ్యం ఒమిక్రాన్కు ఎక్కువగా ఉంది. ఈ కారణంగానే డెల్టా రకం కంటే ఎక్కువ వేగంగా వ్యాప్తి చెందుతోంది."
- పరిశోధన కర్త
అధ్యయనం ప్రకారం.. ప్లాస్టిక్ ఉపరితలంపై వైరస్ జీవించే సామర్థ్యం ఒరిజినల్ వేరియంట్ (56 గంటలు), ఆల్ఫా(191.3 గంటలు), బీటా(156.6 గంటలు), గామా(59.3 గంటలు), డెల్టా(114 గంటలు)గా ఉంది. అదే ఒమిక్రాన్ వేరియంట్ ప్లాస్టిక్ వస్తువులపై 193.5 గంటలు సజీవంగా ఉంటోంది.
చర్మ నమూనాలపై సగటు వైరస్ జీవనకాలం.. ఒరిజినల్ వేరియంట్కు 8.6 గంటలుగా ఉంది. అల్ఫా(19.6 గంటలు), బీటా(19.1 గంటలు), గామా(11 గంటలు), డెల్టా(16.8గంటలు), ఒమిక్రాన్(21.1 గంటలు)గా సజీవంగా ఉంటున్నాయి.
అల్ఫా, బీటా మధ్య జీవనకాలంలో అంత పెద్ద తేడా లేదని, రెండూ ఒకేరకమైన సామర్థ్యాన్ని కలిగి ఉన్నట్లు తేల్చింది అధ్యయనం. అలాగే.. ఇథనాల్ నిరోధకతలో సైతం స్వల్ప పెరుగుదల కనిపించినట్లు పేర్కొంది. ఇథనాల్తో చర్మంపై ఉన్న అన్ని వైరస్లు 15 సెకన్లలో పూర్తిగా నాశనమవుతున్నట్లు తెలిపింది.
సంబంధం కోసం వెతుకుతున్నారా? తెలుగు మాట్రిమోనిలో రిజిస్ట్రేషన్ ఉచితం!
ఇదీ చూడండి: అన్నీ ఒమిక్రాన్ కేసులే.. వేగంగా వ్యాప్తి చెందుతున్న కొత్త వేరియంట్
Omicron community spread: 'దేశంలో సామాజిక వ్యాప్తి స్థాయికి ఒమిక్రాన్'
