అణు కార్యకలాపాల విషయంలో కిమ్ జోంగ్ ఉన్ నేతృత్వంలోని ఉత్తర కొరియా ప్రభుత్వం(kim Jong Un Government).. ప్రపంచ దేశాలకు మళ్లీ సవాళ్లు విసురుతోంది. చాలా నెలల విరామం తర్వాత .. సుదూర లక్ష్యాలను ఛేదించే(లాంగ్ రేంజ్) ఓ క్రూయిజ్ క్షిపణిని(Long Range Cruise Missile) శని, ఆదివారాల్లో ఆ దేశం విజయవంతంగా ప్రయోగించింది. అణుకార్యకలాపాల విషయంలో అమెరికాతో చర్చలకు విముఖత వ్యక్తం చేస్తున్న ఉత్తర కొరియా.. ఈ తాజా ప్రయోగం చేపట్టడం ప్రాధాన్యం సంతరించుకుంది.
'ఇది వ్యూహాత్మక ఆయుధం'
రెండేళ్ల పాటు శ్రమించి ఈ క్షిపణిని అభివృద్ధి చేసినట్లు ఉత్తర కొరియా సెంట్రల్ న్యూస్ ఏజెన్సీ సోమవారం తెలిపింది. ఈ క్షిపణి.. 1,500 కి.మీ దూరంలోని లక్ష్యాలను ఛేదించగలదని చెప్పింది. ఈ ప్రయోగానికి సంబంధించిన ఫొటోలను ప్రచురించింది. ఈ క్షిపణిని తమ వ్యూహాత్మక ఆయుధంగా ఉత్తర కొరియా ప్రభుత్వ అధికారులు పేర్కొన్నారు. ఇది తమ సైనికుల అమ్ముల పొదిలో చేరిన మరో బలమైన అస్త్రమని చెప్పారు.
జనవరిలో జరిగిన అధికార పార్టీ సమావేశంలో తమ అణ్వాయుధాలను రెట్టింపు చేస్తామని ఉత్తర కొరియా అధ్యక్షుడు కిమ్ జోంగ్ ఉన్ ప్రకటించారు. తమ శాస్త్రవేత్తలు.. ప్రపంచంలోనే అత్యంత శక్తిమంతమైన అణ్వాయుధాలను తయారు చేసే పనిలో నిమగ్నమయ్యారని తెలిపారు. ఇందులో భాగంగానే.. ఈ తాజా ప్రయోగాన్ని ఉత్తర కొరియా చేపట్టినట్లు తెలుస్తోంది.
మరోవైపు.. ఉత్తర కొరియా అణు కార్యకలాపాలను అమెరికా నిఘా వర్గాల సాయంతో తాము నిశితంగా పరిశీలిస్తున్నట్లు దక్షిణ కొరియా ప్రభుత్వం తెలిపింది.
ఇవీ చూడండి:
