అధ్యక్షుడి హోదాలో అమెరికా ఉభయ సభల సంయుక్త సమావేశాన్ని ఉద్దేశించి జో బైడెన్ గతవారం తొలిసారి చేసిన ప్రసంగాన్ని తప్పుబట్టింది ఉత్తర కొరియా. అమెరికా 'చాలా ఘోరమైన పరిస్థితిని ఎదుర్కొంటుంది' అని హెచ్చరించింది.
ఉత్తర కొరియా, ఇరాన్ అణు కార్యక్రమాలు అమెరికాతో పాటు ప్రపంచ భద్రతకు తీవ్రమైన ముప్పు కలిగిస్తాయని బైడెన్ అభిప్రాయపడ్డారు. అలాగే ఈ దేశాలపై దౌత్యపరంగా కఠినమైన ఆంక్షలు విధించే అంశాన్ని మిత్ర దేశాలతో చర్చించి నిర్ణయించనున్నట్లు వెల్లడించారు. ఈ వ్యాఖ్యలపై ఉత్తర కొరియా తీవ్రంగా స్పందించింది.
"గత యాభై ఏళ్లుగా ఉత్తర కొరియా పట్ల అమెరికా అనుసరిస్తున్న విధానాన్ని ప్రతిబింబించేలా బైడెన్ ప్రకటన ఉంది. శత్రు విధానాలను అమలు చేయాలనే ఆయన ఉద్దేశం స్పష్టం అవుతోంది. ఈ నేపథ్యంలో ప్రస్తుత పరిస్థితులకు అనుగుణంగా ఉత్తర కొరియా విధానం మారనుంది. అమెరికాపై ఒత్తిడి తీసుకురావాల్సి వస్తుంది. ఈ క్రమంలో అగ్రరాజ్యం చాలా ఘోరమైన పరిస్థితిని ఎదుర్కొంటుంది."
-క్వాన్ జోంగ్ గన్, ఉత్తర కొరియా విదేశాంగ అధికారి
అయితే ఉత్తర కొరియా ఏ రకమైన చర్యలు తీసుకుంటుందో క్వాన్ పేర్కొనలేదు. ఈ ప్రకటన.. బైడెన్పై ఒత్తిడి తెచ్చే ప్రయత్నమేనని అంతర్జాతీయ వ్యవహారాల నిపుణులు అభివప్రాయపడుతున్నారు.
అమెరికా ప్రధాన భూభాగాన్ని చేరేలా అధునాతన అణ్వాయుధాలను అభివృద్ధి చేయనున్నట్లు జనవరిలో కిమ్ ప్రకటించారు.
ఇవీ చదవండి: 'ఆయుధాలను పక్కనపెట్టండి- చర్చలు జరపండి'
