పాకిస్థాన్ మాజీ ప్రధాని నవాజ్ షరీఫ్ తిరిగి లాహోర్లోని కోట్ లఖ్పత్ జైలుకు చేరుకున్నారు. వైద్యం నిమిత్తం షరీఫ్ పొందిన ఆరు వారాల మధ్యంతర బెయిల్ గడువు మంగళవారం అర్ధరాత్రితో ముగిసింది. ఆల్ అజీజీయా మిల్స్ అవినీతి కేసులో నవాజ్ షరీఫ్ ఏడేళ్ల జైలు శిక్ష అనుభవిస్తున్నారు.
తమ నాయకుడు జైలుకు వెళుతున్నారని తెలిసి వందల మంది పాక్ ముస్లిం లీగ్ పార్టీ శ్రేణులు షరీఫ్ నివాసానికి చేరుకున్నారు. ఆయన వెంటే జైలు వరకు వెళ్లారు. 30 నిమిషాల్లో జైలుకు చేరుకునే వీలున్నప్పటికీ అభిమానుల రాకతో నాలుగు గంటల సమయం పట్టింది. అర్ధరాత్రి వరకు ఆయనతోనే ఉండి మద్దతుగా నినాదాలు చేశారు అభిమానులు.
ఇదీ కేసు...
గత ఏడాది డిసెంబర్ 24న మాజీ ప్రధాని షరీఫ్కు ఏడాళ్ల జైలు శిక్ష విధించింది సుప్రీంకోర్టు. ఆల్ అజీజీయా అవినీతి కేసులో ఆయనకు రూ.1.5 బిలియన్ల జరిమానా విధించింది. మొదటగా అదియాలా జైలులో ఉంచినప్పటికీ ఆయన అభ్యర్థన మేరకు కోట్ లఖ్పత్ కారాగారానికి తరలించారు. ఇటీవల బెయిల్పై బయటకు వచ్చారు.
గుండె, కిడ్నీల సమస్యతో బాధపడుతున్న షరీఫ్ మెరుగైన చికిత్స కోసం లండన్ వెళ్లడానికి అనుమతించాలన్న పిటిషన్ను తిరస్కరించింది కోర్టు. మధ్యంతర బెయిల్ గడువు ముగియటం వల్ల తిరిగి జైలుకు వెళ్లాల్సి వచ్చింది.
ఇదీ చూడండి: మహిళా కమాండోల దెబ్బకు ఇద్దరు నక్సల్స్ హతం
