మయన్మార్లో ఉన్న భారత రాయబార కార్యాలయం అక్కడి ప్రవాస భారతీయులకు కీలక సూచనలు చేసింది. మయన్మార్లో సైనిక పాలన దృష్ట్యా జాగ్రత్తగా ఉండాలని సూచించింది. అనవసర ప్రయాణాలు చేయవద్దని పేర్కొంది. ఈ మేరకు పలు సూచనలతో ప్రకటన విడుదల చేసింది.
"మయన్మార్లో ప్రస్తుత పరిస్థితుల దృష్ట్యా, ప్రవాస భారతీయులు అందరూ జాగ్రత్తగా ఉండాలి. ఎటువంటి సహాయం కోసమైనా భారత రాయబార కార్యాలయాన్ని సంప్రదించండి."
- మయన్మార్లో భారత రాయబార కార్యాలయం
భారత రాయబార కార్యాలయం లెక్కల ప్రకారం మయన్మార్లో 7 వేల మంది ప్రవాస భారతీయులు ఉన్నారు. 15 లక్షల నుంచి 25 లక్షల వరకు భారతీయ మూలాలున్న వారు నివసిస్తున్నారు.
భారత్ ఆందోళన..
మయన్మార్లో ప్రజాస్వామ్యం అన్నది మూన్నాళ్ల ముచ్చటగానే ముగిసింది. ఆ దేశ సైన్యం చేసిన కుట్రను అంతర్జాతీయ సమాజం తీవ్రంగా తప్పుపడుతోంది. మయన్మార్లో భారీమెజారిటీతో కొత్తగా ఏర్పడిన ప్రభుత్వం తొలిసారి పార్లమెంటు సమావేశం నిర్వహించేందుకు సిద్ధమవడానికి కొద్ది గంటల ముందు ఆదివారం అర్ధరాత్రి తర్వాత ప్రజాప్రభుత్వం కుప్పకూలింది. అధికార పార్టీ ఎన్ఎల్డీ అధ్యక్షురాలు ఆంగ్‌సాన్‌సూకితో పాటు.... ఆ దేశాధ్యక్షుడు విన్ మియింట్‌ సైనిక నిర్బంధంలో ఉన్నారు.
అంతర్జాలం సహా టీవీ సిగ్నల్స్‌ను సైన్యం నిలుపుదల చేయడం వల్ల ఎప్పుడు ఏం జరుగుతుందో అన్న ఆందోళనలో ప్రజలు ఉన్నారు. ఈ పరిణాలపై స్పందించిన భారత్.. ప్రజాస్వామ్యం కంటే అత్యున్నతమైనది లేదని.. ప్రజాప్రభుత్వాన్ని తిరిగి ప్రతిష్ఠించాలని పేర్కొంది.
