థాయ్లాండ్లోని 'ఫిఫిలే' ద్వీపంలో ఉన్న 'మాయా' బీచ్ను సందర్శించాలనుకుంటున్న వారికి చేదు వార్త చెప్పింది అక్కడి ప్రభుత్వం. ఇప్పుడున్న పర్యటక నిషేధ గడువున మరింత కాలం పొడిగించింది. 2021 వరకు బీచ్లోకి పర్యటకులకు అనుమతి లేదని ప్రకటించింది.
గత కొన్నేళ్లుగా ఈ సుందరమైన సముద్ర తీరాన్ని చూసేందుకు దేశవిదేశాల నుంచి పెద్దసంఖ్యలో యాత్రికులు వస్తున్నారు. ఫలితంగా ఇక్కడి తీరప్రాంత పర్యావరణం పూర్తిగా దెబ్బతింది. తిరిగి మామూలు స్థితికి వచ్చేందుకు మరింత సమయం పడతుందనే కారణంగా ఈ నిర్ణయం తీసుకున్నారు అధికారులు.
చూపరులను కట్టిపడేసే సహజసిద్ధ వనరులు, చక్కటి తీరప్రాంతం, సూది వేసినా కనిపించేంత స్పష్టంగా ఉండే సముద్ర జలంతో కూడిన మాయాబీచ్... థాయ్లాండ్లోని పర్యటక ప్రాంతాల వరుసలో ముందు ఉంటుంది. అందుకే ఈ చూడచక్కని సముద్ర తీరాన్ని సందర్శించేందుకు ప్రతిరోజు సరాసరి 4 వేల మందికి పైగా పర్యటకులు వస్తుంటారు. కేవలం 2018లోనే 25 లక్షల మంది ప్రజలు ఈ తీరప్రాంతాన్ని సందర్శించారని థాయ్లాండ్ అధికారులు తెలిపారు. బీచ్ సందర్శన పునఃప్రారంభమయ్యాక కూడా పర్యావరణాన్ని దృష్టిలో పెట్టుకుని రోజుకు 2 వేల మంది పర్యటకులను మాత్రమే అనుమతించాలని థాయ్ ప్రభుత్వం భావిస్తోంది.
గతేడాదే పర్యటకులకు నో ఎంట్రీ
బీచ్లో పర్యావరణం దెబ్బతిన్న కారణంగా పర్యటకులను అనుమతించకూడదని గతేడాది జూన్లో నిర్ణయం తీసుకున్నారు అధికారులు. తాత్కాలికంగా 4 నెలల పాటు మూసివేస్తున్నట్లు అప్పట్లో ప్రకటించారు. అయితే తీరంలోని వనరులు పూర్తిగా మామూలుస్థితికి రావడానికి మరింత సమయం అవసరమని నిపుణులు సూచించారు. ఫలితంగా మరోసారి బీచ్ సందర్శనకు ప్రభుత్వం అడ్డుకట్ట వేసింది.
'ద బీచ్'తో ప్రసిద్ధి
టైటానిక్ కథానాయకుడు, ఆస్కార్ గ్రహీత లియోనార్డో డికాప్రియో నటించిన 'ద బీచ్' చిత్రాన్ని 1999లో ఈ సముద్రంలోనే చిత్రీకరించారు. ఫలితంగా మాయాబీచ్ ప్రపంచ దేశాల ప్రజలకు మరింత చేరువైంది.
ఇదీ చూడండి : వాళ్లొస్తున్నారని 'రెడ్ లైట్ ఏరియా' బంద్
