అసలే కరోనా కాలం. విమాన ప్రయాణాలు చేయాలంటే.. ఎన్నో ఆంక్షలు. అయితే.. ఈ ఆంక్షల నుంచి తప్పించుకుని వేరే ప్రాంతానికి వెళ్దామనుకున్న ఓ వ్యక్తి.. అతి తెలివి ప్రదర్శించాడు.
అసలేం జరిగింది?
కరోనా సోకినప్పటికీ.. ఇండోనేసియాకు చెందిన ఓ వ్యక్తి వేరే ప్రాంతానికి వెళ్లాలనుకున్నాడు. అందుకు తన భార్యలా వేషాన్ని మార్చుకున్నాడు. బురఖా వేసుకుని, భార్య గుర్తింపు కార్డును, ఆమెకు కరోనా ఆర్టీపీసీఆర్ పరీక్ష చేయించగా వచ్చిన నెగెటివ్ రిపోర్టును పెట్టుకుని, జకార్తా నుంచి మలుకు దీవుల్లోని టెర్నేట్కు విమాన ప్రయాణం చేశాడు. అయితే.. అతడు బాత్రూంలో బట్టలు మార్చుకుని బయటకు వస్తుండగా అధికారులు పసిగట్టారు.
"తన భార్య పేరు మీద అతడు విమాన టికెట్ కొనుక్కున్నాడు. ఆమె గుర్తింపు కార్డే తెచ్చుకున్నాడు. తన భార్య పేరు మీదనే పీసీఆర్ పరీక్ష ఫలితం సహా టీకా తీసుకున్నట్లు ధ్రువపత్రం తెచ్చుకున్నాడు. మిగతా అన్ని పత్రాలను తన భార్య పేరు మీదవే."
-ఆదిత్య లక్సిమాదా, టెర్నేట్ పోలీస్ అధికారి
అధికారులు అతడికి కరోనా పరీక్షలు నిర్వహించగా పాజిటివ్గా నిర్ధరణ అయింది. ప్రస్తుతం అతడు క్వారంటైన్లో ఉన్నాడు. ఈ ఘటనపై పోలీసులు దర్యాప్తు చేస్తున్నారు.
ఇండోనేసియాలో కరోనా బీభత్సం సృష్టిస్తోంది. కొత్తగా అక్కడ 33,372 మందికి పాజిటివ్ సోకినట్లు తేలింది. వైరస్ ధాటికి మరో 1,383 మంది మరణించారు.
ఇదీ చదవండి : 'డబ్ల్యూహెచ్ఓ ప్రకటనతో షాక్ అయ్యాం'
