తాను ఒక్కడినే 2000 మందికిపైగా భద్రతా సిబ్బందిని హత్య చేసినట్టు.. ఎల్టీటీఈ (లిబరేషన్ టైగర్స్ ఆఫ్ తమిళ ఈలం) మాజీ డిప్యూటీ కరుణ అమ్మన్ చేసిన వ్యాఖ్యలు శ్రీలంకలో ప్రకంపనలు సృష్టిస్తున్నాయి. ఈ నేపథ్యంలో కరుణ అమ్మన్ వ్యాఖ్యలపై దర్యాప్తు జరపాలని శ్రీలంక ప్రభుత్వం పోలీసులను ఆదేశించింది.
అమ్మన్ వ్యాఖ్యలపై తక్షణమే విచారణ జరపాలని శ్రీలంక నేర దర్యాప్తు విభాగానికి ఆదేశాలు జారీ చేశారు ఆ దేశ పోలీసుశాఖ సారథి చందన విక్రమరత్నె. ఈ విషయాన్ని శ్రీలంక రక్షణశాఖ ఓ ప్రకటనలో తెలిపింది.
ఎన్నికల ర్యాలీలో...
శ్రీలంకలో ఆగస్టు 5న పార్లమెంటరీ ఎన్నికలు జరగనున్నాయి. ఈ నేపథ్యంలో ప్రచారాలు ఊపందుకున్నాయి. గత వారం ఓ ర్యాలీలో ప్రజలనుద్దేశించి ప్రసంగించారు ఎల్టీటీఈ మాజీ డిప్యూటీ కరుణ అమ్మన్. ప్రభుత్వంపై ఎల్టీటీఈ సాగించిన మూడు దశాబ్దాల పోరులో.. తాను ఒక్కడినే అనేకమంది భద్రతా సిబ్బందిని హతమార్చినట్టు వ్యాఖ్యానించారు అమ్మన్. ఎలిఫాంట్ పాస్ వేదికగా ఓ రోజు తాను 2000-3000కుపైగా శ్రీలంక సిబ్బందిని చంపినట్టు వెల్లడించారు. ఇది దేశంలో కరోనా మరణాల కన్నా ఎక్కువని పేర్కొన్నారు.
శ్రీలంక తమిళుల స్వాతంత్ర్యం కోసం ఎల్టీటీఈని 1976 సంవత్సరంలో పెద్దపులిగా పిలిచే వేలుపిళ్లై ప్రభాకరన్ స్థాపించారు. అందులో రెండో కీలక వ్యక్తి అమ్మన్. 2004లో ఎల్టీటీఈ నుంచి విడిపోయిన ఆయన.. సొంతంగా పార్టీని స్థాపించారు. అనంతరం 2009లో ప్రభుత్వం చేతిలో ఎల్టీటీఈ ఓడిపోయింది.
ఆ తర్వాత.. అప్పటి శ్రీలంక అధ్యక్షుడు మహింద రాజపక్సతో చేతులు కలిపి 2010లో పార్లమెంట్లో అడుగుపెట్టారు అమ్మన్.
అప్పటి నుంచి రాజపక్స పార్టీ.. ఎస్ఎల్పీపీకి అమ్మన్ సన్నిహితుడు. అయితే తాజాగా అమ్మన్ వ్యాఖ్యలు తీవ్ర దుమారం రేగడం వల్ల.. మాజీ ఎల్టీటీఈ డిప్యూటీతో తమకు సంబంధం లేదని ఎస్ఎల్పీపీ తెలిపింది.
