ఉత్తర కొరియా అధ్యక్షుడు కిమ్ జోంగ్ ఉన్ అత్యంత ప్రమాదకర పర్వతంపై గుర్రపు సవారీ చేశారు. తెల్లటి మంచుతో కప్పేసిన పయేక్టు అనే పర్వతంపై ఆయన ఒక్కరే సవారీ చేసినట్లు ఆ దేశ అధికారిక మీడియా వెల్లడించింది. ఇది కొరియా ద్వీపకల్పంలోనే అత్యంత ఎత్తైన పర్వతం. కిమ్ తెల్లటి గుర్రాన్ని ఎక్కి షికారు చేస్తున్న ఫొటోలు కూడా బయటకి వచ్చాయి.
ఉత్తరకొరియాలో పయేక్టు పర్వతం కిమ్ వంశానికి ఆధ్యాత్మికంగా అతి ముఖ్యమైంది. ఒంటరిగా తెల్ల గుర్రంపై సవారీని కిమ్ బాగా ఆస్వాదించినట్లు ఆయన సహాయకులు తెలిపారు. అది ప్రమాదకరమైన పర్వతమైనప్పటికీ కిమ్ ఏ మాత్రం భయపడకుండా తన పర్యటనను పూర్తి చేశారని మీడియా పేర్కొంది. కొరియా చరిత్రలో ఇదో అద్భుతమైన ఘట్టంగా అభివర్ణించింది. ఏవైనా కీలక నిర్ణయాలు తీసుకునే సమయంలో కిమ్ ఇలాంటి సాహస యాత్రలు చేస్తారని తెలుస్తోంది. మరి ఈసారి కిమ్ దేనిపై ప్రకటన చేస్తారో తెలియాల్సి ఉంది.
ఇదీ చూడండి: అతి త్వరలో మోదీ-ఇమ్రాన్ భేటీ..!
