ఇజ్రాయెల్ ఆక్రమిత గోలన్ హైట్స్లో అగ్రరాజ్యం అధ్యక్షుడు డొనాల్డ్ ట్రంప్ పేరుతో గ్రామాన్ని నిర్మించనుంది ప్రభుత్వం. ఇందుకు సంబంధించిన ప్రణాళికలను అమోదించినట్లు ఇజ్రాయెల్ కేబినెట్ మంత్రి హోటోవెలీ ఆదివారం వెల్లడించారు. రామత్ ట్రంప్ పేరుతో నిర్మించబోయే ఈ గ్రామంలో.. 300 కుటుంబాలకు ఆశ్రయం కల్పించనున్నట్లు తెలిపారు. ఇందుకు సంబంధించిన ఏర్పాట్లకు సన్నద్ధమవుతున్నట్లు పేర్కొన్నారు.
1967 మిడిల్ ఈస్ట్ యుద్ధంలో సిరియా నుండి గోలన్ హైట్స్ను ఇజ్రాయెల్ ఆక్రమించుకుంది. దానిని 1981లో స్వాధీనం చేసుకుంది. అంతర్జాతీయ సమాజం ఈ చర్యను తప్పుపట్టింది. ఆ భూభాగంలో ఇజ్రాయెల్ స్థావరాలు నిర్మించడం అంతర్జాతీయ నిబంధనల ప్రకారం చట్టవిరుద్ధమని విమర్శించింది.
ట్రంప్ అండ..
అయితే అమెరికా అధ్యక్షుడు డొనాల్డ్ ట్రంప్ ఇజ్రాయెల్కు మద్దతుగా నిలిచారు. వ్యూహాత్మక పర్వత పీఠభూమిని ఇజ్రాయెల్ భూభాగంగా గుర్తిస్తూ 2019లో ఎగ్జిక్యూటివ్ ఆర్డర్పై సంతకం చేశారు. ఇజ్రాయెల్ ఎన్నికలకు కొద్ది వారాల ముందు ఆ దేశ ప్రధాని బెంజమిన్ నెతన్యాహు.. వాషింగ్టన్ పర్యటన సందర్భంగా ఈ పరిణామాలు జరిగాయి. ఇజ్రాయెల్కు ప్రయోజనం చేకూర్చే అనేక దౌత్యపరమైన చర్యలలో ఈ నిర్ణయం కూడా ఒకటని ప్రభుత్వం నుంచి విస్తృత ప్రశంసలు వచ్చాయి.
ట్రంప్ పేరుతో నిర్మించబోయే రామత్ ట్రంప్ ప్రాంతాన్ని అభివృద్ధి చేసేందుకు 2.3 మిలియన్ డాలర్లు వెచ్చించనుంది ఇజ్రాయెల్ ప్రభుత్వం. నెతన్యాహు గత సంవత్సరం ప్రకటించిన ఈ ప్రాజెక్టును పూర్తి చేయనుంది.
గోలన్ హైట్స్‌పై ఇజ్రాయెల్ సార్వభౌమత్వాన్ని అమెరికా అధ్యక్షుడు గుర్తించినందుకు ఓ ప్రాంతానికి ఆయన పేరు పెట్టాలని గతేడాది జూన్లో కేబినేట్ సమావేశం ఏర్పాటు చేసి ఓటింగ్ నిర్వహించారు నెతన్యాహు. రామత్ ట్రంప్ ఏర్పాటు కోసం ఆచరణాత్మక చర్యలు ప్రారంభిస్తామని ఆదివారం జరిగిన కేబినెేట్ సమావేశంలో వెల్లడించారు.
గోలన్ హైట్స్లో గత కొద్ది సంవత్సరాలలో పదుల సంఖ్యలో నివాసాలను నిర్మించింది ఇజ్రాయెల్. 2019 నాటికి అక్కడ 26,000 మంది వలస యూదులు నివసిస్తున్నట్లు అధికారిక గణాంకాలు స్పష్టం చేస్తున్నాయి.
