భారత్పై ఐక్యరాజ్య సమితి సాధారణ అసెంబ్లీ అధ్యక్షుడు తిజ్జన్ మహ్మద్ బండే ప్రశంసల వర్షం కురిపించారు. అంతర్జాతీయ వేదికల్లో భారత్ ఎంతో బాధ్యతాయుతమైన పాత్ర పోషిస్తోందని కొనియాడారు. ఐరాస భద్రతా మండలి(యూఎన్ఎస్సీ)లో తాత్కాలిక సభ్య దేశంగా ఉన్న భారత్.. వివిధ రంగాల అభివృద్ధికి కృషి చేయగలదని పేర్కొన్నారు.
"సాంకేతికత, ప్రజలు, వారి ఆలోచనల పరంగా.. ప్రపంచదేశాలకు భారత్ ఎంతో ముఖ్యం. వివిధ అంతర్జాతీయ సంస్థల్లో శక్తిమంతమైన సభ్య దేశంగా భారత్ కొనసాగుతోంది. ఆయా దేశాలు ఐరాస వేదికగా చర్చలు జరపడానికి, భద్రతా మండలి సభ్య దేశంగా భారత్ కృషి చేయగలదు."
-- తిజ్జన్ మహ్మద్ బండే, ఐరాస సాధారణ అసెంబ్లీ అధ్యక్షుడు.
ఐరాస భద్రతామండలిలోని 5 తాత్కాలిక సభ్యదేశాల కోసం జూన్ 17న జరిగిన ఎన్నికల్లో భారత్ ఘనవిజయం సాధించింది. రహస్య బ్యాలెట్ పద్ధతిలో జరిగిన ఈ ఎన్నికల్లో మొత్తం 192లో.. 184 ఓట్లు దక్కించుకుంది. భారత రెండేళ్ల పదవీ కాలం వచ్చే ఏడాది జనవరి నుంచి ప్రారంభం కానుంది.
ఆసియాలోనే కాకుండా ప్రపంచవ్యాప్తంగా ఉన్న దేశాలకు భారత్ గొప్పగా మద్దుతునిస్తోందని బండే పేర్కొన్నారు. యూఎన్ఎస్సీ సభ్య దేశంగా భారత్పై ఎలాంటి అంచనాలున్నాయన్న ప్రశ్నకు ఈ మేరకు బదులిచ్చారు. వ్యాక్సిన్, చికిత్స వంటి వైద్య సదుపాయాలు అందరికీ చేరాలన్న ఐరాస లక్ష్యానికి భారత్ ఎంతో సహాయం చేయగలదని అభిప్రాయపడ్డారు.
వ్యాక్సిన్లు అందరికీ అందుబాటులో ఉంచాలన్న సాధారణ అసెంబ్లీ తీర్మానాన్ని సభ్యదేశాలు అంగీకరించాయని వెల్లడించారు మహ్మద్.
"అభివృద్ధి చేసిన అనంతరం వ్యాక్సిన్లను త్వరగా ఉత్పత్తి చేయగల దేశాలకు ఒక బాధ్యత ఉంటుంది. ఇది జరగడానికి నిధులు కావాలి. అనంతరం ఎవరికి వ్యాక్సిన్ అందుబాటులో ఉండాలన్న విషయాన్ని నిర్ణయించడానికి ఓ వ్యవస్థను రూపొందిస్తాం. ఈ కరోనా సంక్షోభానికి ముందే.. వైద్య సదుపాయాలు అందుబాటులో లేక అనేక దేశాలు సతమతమయ్యాయి. ఈ పరిస్థితులను కరోనా వైరస్ మరింత తీవ్రం చేసింది."
-- తిజ్జన్ మహ్మద్ బండే, ఐరాస సాధారణ అసెంబ్లీ అధ్యక్షుడు.
