భారత్- అమెరికా ద్వైపాక్షిక పౌర అణు ఒప్పందంలో మరో ముందడుగు పడింది. ఇరుదేశాల మధ్య తాజాగా ద్వైపాక్షిక పౌర అణు ఇంధన సహకార ఒప్పందం కుదిరింది. ఇందులో భాగంగా అమెరికా ఆరు అణు విద్యుత్ ప్లాంట్లను భారత్లో నిర్మిస్తుంది.
భారత్-అమెరికాల మధ్య తాజాగా 9వ రౌండ్ వ్యూహాత్మక భద్రతా చర్చలు ముగిశాయి. ఈ సందర్భంగా ఇరుదేశాలు 'ద్వైపాక్షిక పౌర అణు ఇంధన సహకార ఒప్పందం'పై ఉమ్మడి ప్రకటన చేశాయి. ఈ ద్వైపాక్షిక చర్చల్లో భారత విదేశీ వ్యవహారాల కార్యదర్శి విజయ్ గోఖలే, అమెరికా ఆయుధ నియంత్రణ, అంతర్జాతీయ భద్రతా కార్యదర్శి ఆండియా థాంప్సన్ పాల్గొన్నారు.
"భారత్లో 6 అణు విద్యుత్ కేంద్రాలను అమెరికా ఏర్పాటు చేస్తుంది. ఇరుదేశాల మధ్య ద్వైపాక్షిక భద్రత, పౌర అణు సహకారాన్ని బలోపేతం చేసేందుకు మేము కట్టిబడి ఉన్నాం."- భారత్-అమెరికా సంయుక్త ప్రకటన
చారిత్రక ఒప్పందం...
భారత్ అమెరికాల మధ్య 2008, అక్టోబర్లో చారిత్రక 'పౌర అణు ఒప్పందం' జరిగింది. పౌర అణుశక్తి రంగాల్లో ఇరుదేశాల మధ్య ద్వైపాక్షిక సంబంధాలు వృద్ధి చెందాయి.
ఈ ఒప్పందం వల్ల 'అణు సరఫరా దేశాల సమూహం' (ఎన్ఎస్జీ)లో భారతదేశం చేరకపోయినా ప్రత్యేక మినహాయింపు లభించింది.
ఫలితంగా భారత్ 'పౌర అణు సహకార ఒప్పందాన్ని' అమెరికా, ఫ్రాన్స్, రష్యా, కెనడా, అర్జెంటీనా, ఆస్ట్రేలియా, శ్రీలంక, యూకే, జపాన్, వియత్నాం, బంగ్లాదేశ్, ఖజకిస్థాన్, దక్షిణ కొరియాతో చేసుకోగలిగింది.
మోకాలడ్డుతున్న చైనా...
బుధవారం జరిగిన ద్వైపాక్షిక చర్చల సందర్భంగా, 'ఎన్ఎస్జీ'లో భారత సభ్యత్వానికి అమెరికా మరోసారి మద్దతు తెలిపింది. కాగా అణ్వాయుధాల విస్తరణను నివారించడానికి ప్రయత్నిస్తోన్న 48 సభ్య దేశాలు గల ఎన్ఎస్జీలో భారత్ సభ్యత్వం పొందకుండా చైనా కొంత కాలంగా అడ్డుకుంటోంది.
