కశ్మీర్ అంశంలో పాకిస్థాన్ తన వక్రబుద్ధిని కొనసాగిస్తోంది. వచ్చే నెలలో జరిగే ఐక్యరాజ్య సమితి సర్వసభ్య సమావేశంలో పాక్ ప్రధాని ఇమ్రాన్ ఖాన్ కశ్మీర్ వ్యవహారాన్ని లేవనెత్తనున్నారని ఆ దేశ మీడియా వర్గాలు వెల్లడించాయి.
సెప్టెంబర్‌ 27న ఐరాస సాధారణ అసెంబ్లీలో ఇమ్రాన్ ఖాన్ ప్రసంగించనున్నారు. న్యూయార్క్‌లో ఈ సమావేశం జరిగే సమయంలో.. భారత్కు, ప్రధాని మోదీకి వ్యతిరేకంగా నిరసన ప్రదర్శనలు జరపడానికి మద్దతు కూడగట్టాలని పార్టీ వర్గాలను ఇమ్రాన్ ఆదేశించినట్లు సమాచారం.
సెప్టెంబర్‌ 23 నుంచి ఇమ్రాన్ నాలుగు రోజుల పాటు అమెరికాలో పర్యటించనున్నారు. ఈ సందర్భంగా పలువురు దేశాధినేతలతో సమావేశం అవుతారని ఆ దేశ మీడియా వెల్లడించింది. దీంతో పాటు అమెరికాలోని పాక్ సంతతి ప్రజలు, వ్యాపార వర్గాలతో ఇమ్రాన్ సమావేశం నిర్వహించనున్నారని తెలిపింది.
మానవహక్కుల హైకమిషనర్కు లేఖ
కశ్మీర్లో నెలకొన్న పరిస్థితులపై ఐక్యరాజ్య సమితి మానవహక్కుల హైకమిషనర్ మిచెల్ బాచిలెట్కు మరోమారు లేఖ రాసింది పాకిస్థాన్. జమ్ముకశ్మీర్కు ప్రత్యేక ప్రతిపత్తి కల్పించే అధికరణ 370 రద్దు తర్వాతి పరిణామాలను లేఖలో పేర్కొన్నట్లు ఆ దేశ విదేశాంగ శాఖ తెలిపింది. ఐరాస భద్రత మండలి, యూఎన్ సభ్య దేశాలకు ఈ లేఖను పంపనున్నట్లు పేర్కొంది.
కశ్మీర్ అంశంపై గతంలో ఆగస్టు 4న మహమ్మూద్ ఖురేషీ ఐరాస మానవహక్కుల కమిషనర్కు లేఖ రాశారు. ఆగస్టు 8న ఫోన్లో మాట్లాడారు.
ఇదీ చూడండి: మైనార్టీల భద్రతపై ఐరాసలో పాక్, చైనాకు అక్షింతలు
