డ్రోన్ను తలపించే ఫ్లయింగ్ ట్యాక్సీ (హోవర్ ట్యాక్సీ)ని సింగపూర్లో విజయవంతంగా పరీక్షించారు. జర్మనీ సంస్థ వోలోకాప్టర్ తయారుచేసిన ఈ ట్యాక్సీ.. నిత్యం ట్రాఫిక్ సమస్యలతో సతమతమయ్యే ఆసియా నగరాల్లో ఈ ఫ్లయింగ్ ట్యాక్సీ విప్లవాత్మక మార్పులు తెస్తుందని వోలోకాప్టర్ భావిస్తోంది.
టెస్ట్ ఫ్లైట్లో 18 ప్రొపెల్లర్లు ఉన్న ఈ హోవర్ ట్యాక్సీ.. ప్రొమోంటరీ నుంచి బయలుదేరి మెరినా బే చుట్టూ రెండు నిమిషాల 30 సెకెన్ల పాటు ప్రయాణించింది.
డ్రోన్ సాంకేతికత
హోవర్ ట్యాక్సీలు చిన్న హెలికాప్టర్లను పోలి ఉంటాయి. కానీ ఇవి డ్రోన్ లాంటి సాంకేతిక పరిజ్ఞానం కలిగి ఉంటాయి. ఇవి స్వయంచాలకంగా పనిచేస్తాయి. అయితే పరీక్ష సమయంలో భద్రత కారణాల రీత్యా పైలట్ను వినియోగించారు.
వోలోకాప్టర్ ఇప్పటికే దుబాయ్, హెల్సింకీ, జర్మనీ, లాస్వెగస్ల్లో ఈ పరీక్షలు నిర్వహించింది. సింగపూర్లో ఈ పరీక్షలు జరపడం మాత్రం ఇదే మొదటిసారి. మరో రెండు నుంచి నాలుగు ఏళ్లలో వాణిజ్యపరంగా ఈ హోవర్ ట్యాక్సీలు అందుబాటులోకి తెచ్చేందుకు వోలోకాప్టర్ ప్రయత్నిస్తోంది. ముఖ్యంగా ట్రాఫిక్ సమస్యలు ఎక్కువగా ఉండే ఆసియా దేశాల్లో వీటిని ప్రవేశపెట్టాలని భావిస్తోంది.
"హోవర్ ట్యాక్సీలను జకార్తా, మనీలా, బ్యాంకాక్లకు తీసుకురావాలని మేము లక్ష్యంగా పెట్టుకున్నాం. భారత్, చైనాకు వీటి అవసరం చాలా ఉంది."- ఫ్లోరియన్ రౌటర్, వోలోకాప్టర్ చీఫ్ ఎగ్జిక్యూటివ్
ఈ వారం ప్రారంభంలో వోలోకాప్టర్... ఫ్లయింగ్ ట్యాక్సీ పోర్టును, ల్యాండింగ్, టేకాఫ్ ప్యాడ్ను, ప్రయాణికుల టెర్మినల్ను 'వోలోపోర్ట్' వద్ద ఆవిష్కరించింది. అయితే దీనిని ఇంకా అధికారికంగా ధ్రువీకరించలేదు.
హోవర్ క్రాప్ట్ ప్రస్తుత రవాణా సాధనాలకు ప్రత్యామ్నాయం మాత్రమే కాదని, ఇది మరో ప్రయాణ ఎంపిక మాత్రమే అని వోలోకాప్టర్ సహభాగస్వామి స్కైపోర్ట్స్ మేనేజింగ్ డైరెక్టర్ డంకన్ వాల్కర్ పేర్కొన్నారు.
గట్టిపోటీ
వోలోకాప్టర్లో చైనా కార్ల తయారీ సంస్థ గిలీ భాగస్వామిగా ఉంది. ఈ సంస్థ.. గూగుల్ సహవ్యవస్థాపకుడు లారీ పేజ్ మద్దతు ఉన్న కిట్టీహాక్ నుంచి, ఉబెర్ నుంచి గట్టిపోటీ ఎదుర్కొంటోంది.
ఇదీ చూడండి: ఇకపై వాట్సాప్ గ్రూపుల్లో చేర్చడం అంత సులువు కాదు!
