అఫ్గానిస్థాన్‌లో ప్రభుత్వ ఏర్పాటుకు(Afghanistan Crisis) సిద్ధమవుతోన్న తాలిబన్లు.. పాత ప్రభుత్వానికి చెందిన ఈ-మెయిళ్లపై దృష్టిపెట్టారు. వాటి యాక్సెస్‌ కోసం ప్రయత్నాలు చేస్తున్నారు. దీంతో గూగుల్ వాటిని నిలిపివేసినట్లు తెలుస్తోంది. అఫ్గాన్ ప్రభుత్వానికి చెందిన ఈ-మెయిల్‌ అకౌంట్లను తాత్కాలికంగా స్తంభింపజేసినట్లు ఈ వ్యవహారంతో సంబంధమున్న గూగుల్ ప్రతినిధి ఒకరు వెల్లడించారు. ఈ మేరకు రాయిటర్స్ వార్తాకథనం పేర్కొంది.
అఫ్గానిస్థాన్‌ను హస్తగతం చేసుకున్న తర్వాత తాలిబన్లు(Afghan Taliban).. అమెరికాకు అనుకూలంగా పనిచేసినవారి వివరాలు తెలుసుకునేందుకు అఫ్గాన్ ప్రభుత్వ డేటాబేస్‌ను ఉపయోగించే అవకాశముందని అప్పట్లో వార్తలు వచ్చాయి. ఇందుకోసం ప్రభుత్వ అధికారిక ఈ-మెయిళ్ల ఖాతాలను పొందేందుకు తాలిబన్లు ప్రయత్నిస్తున్నారని గత ప్రభుత్వానికి చెందిన ఓ అధికారి చెప్పినట్లు రాయిటర్స్ తెలిపింది. తాను పనిచేస్తున్న మంత్రిత్వ శాఖకు చెందిన సర్వర్ల డేటాను భద్రపర్చమని గత నెల తాలిబన్‌ ప్రతనిధి ఒకరు తనను కోరినట్లు ఆ అధికారి వెల్లడించారు. అయితే భద్రతా కారణాల దృష్ట్యా ఆ అధికారి వివరాలను రాయిటర్స్ బయటపెట్టలేదు.
దీంతో గూగుల్ చర్యలు చేపట్టింది. అఫ్గాన్ ప్రభుత్వ ఈ-మెయిల్‌ ఖాతాలను తాత్కాలికంగా లాక్‌ చేసినట్లు సమాచారం. అఫ్గాన్లో పరిస్థితులను ఎప్పటికప్పుడు సమీక్షిస్తున్నామని, ప్రభుత్వ ఖాతాల రక్షణ కోసం చర్యలు తీసుకుంటామని గూగుల్ ఓ ప్రకటనలో తెలిపింది. అయితే ఖాతాల స్తంభనపై స్పందించేందుకు మైక్రోసాఫ్ట్‌ నిరాకరించింది.
తాలిబన్ల చేతుల్లోకి(Taliban Nnews) ప్రభుత్వ డేటాబేస్‌ వెళ్లిపోతే.. గత ప్రభుత్వంలో పనిచేసిన వేలాది మంది ఉద్యోగుల వివరాలు వారు తెలుసుకునేందుకు వీలుంటుంది. తాలిబన్లకు వ్యతిరేకంగా అఫ్గాన్ ప్రభుత్వంలో పనిచేసిన వారిపై ముష్కరులు ఇప్పుడు ప్రతీకారం తీర్చుకునే ప్రమాదం ఉందని ఆ మధ్య కథనాలు వెలువడిన విషయం తెలిసిందే. ఇప్పటికే పలువురు జర్నలిస్టుల ఇళ్లపై తాలిబన్లు దాడులు చేశారు.
