జీ-20 సదస్సులో.. కరోనా నుంచి ప్రజల ప్రాణాలను రక్షించడం, మహమ్మారి వల్ల పతనమైన ఆర్థిక వ్యవస్థను పునరుద్ధరించడం, ఉత్తమ భవిష్యత్తుకు పునాది వేయడం అనే అంశాలపై చర్చించారు ఆయా దేశాధినేతలు. వర్చువల్గా జరిగిన ఈ సమావేశంలో.. కరోనాపై పోరులో జీ-20 దేశాలు ఏ విధంగా కీలక పాత్ర పోషిస్తున్నాయనే దాని గురించి మాట్లాడారు. వైరస్ కట్టడి, వ్యాక్సిన్ ఉత్పత్తి, పంపిణీనే ప్రధాన అజెండాగా సాగిందీ సదస్సు.
ఎవరేమన్నారంటే..
''ప్రపంచవ్యాప్తంగా మానవాళికి ఈ జీ-20 సదస్సు నుంచి ఓ భరోసా కల్పిస్తూ సందేశాన్ని పంపాలి. ఇప్పటికే వైరస్ కోసం జీ-20 దేశాలు బిలియన్ డాలర్లు ఖర్చు చేస్తున్నాయి. చాలా దేశాలు తమ సొంత టీకాని అభివృద్ధి చేసే దానిపై కూడా దృష్టి పెట్టాయి. సదస్సులో భాగమైన అమెరికా,బ్రిటన్, ఫ్రాన్స్, జర్మనీ వంటి దేశాలు నేరుగా ఔషధ సంస్థలతో చర్చలు జరిపాయి. తద్వారా వచ్చే ఏడాది నాటికి టీకాలు పూర్తి స్థాయిలో అందుబాటులోకి వస్తాయని ఆశిస్తున్నా.''
- సల్మాన్, సౌదీ అరేబియా రాజు
''కరోనా వైరస్పై పోరాటంలో భాగంగా వ్యాక్సిన్ను అభివృద్ధి చేయడం, దేశ ఆర్థిక వ్యవస్థను తిరిగి గాడిలో పెట్టేందుకు పటిష్ఠ చర్యలు చేపట్టాం. వాటి ఫలితాలు త్వరలోనే పొందుతాం. ఈ సదస్సులో అందరితో కలిసి పనిచేయడం ఆనందంగా ఉంది. మరికొంత కాలం పనిచేయాలని ఉంది.''
- డొనాల్డ్ ట్రంప్, అమెరికా అధ్యక్షుడు
''కరోనాకు వ్యతిరేకంగా ఆరోగ్యపరమైన సాంకేతిక పరిజ్ఞానాన్ని అభివృద్ధి చేసుకోవాలి. అంతేగాక తదుపరి ఎదుర్కొవాల్సిన సవాళ్ల గురించి కూడా జాగ్రత్త పడాలి.''
- ఇమ్మాన్యుయేల్ మేక్రాన్, ఫ్రాన్స్ అధ్యక్షుడు
''ప్రపంచ ఆరోగ్య సంస్థను బలోపేతం చేయాలి. అందరం సమష్టిగా కృషి చేస్తే అన్ని దేశాలకు వ్యాక్సిన్ చవకైన ధరలో దొరుకుతుంది. తద్వారా మహమ్మారిని అరికట్టగలం.''
-ఏంజెలా మెర్కెల్, జర్మనీ ఛాన్సలర్
''కొవిడ్ను అంతం చేయడానికి, వాతావరణ మార్పులను పరిష్కరించడానికి సంపన్న దేశాల వనరులను ఉపయోగించుకోవాలి. మన భవిష్యత్తు మన చేతుల్లోనే ఉంది. కరోనా బారిన పడిన తరువాత కూడా వర్చువల్ విధానంలో జరిగిన సమావేశాలకు హాజరయ్యాను. ప్రజల ఆరోగ్యం, ఆర్థిక వ్యవస్థను ఒకే సమయంలో చూసుకోవాల్సిన సమయమిది.''
- జోరిస్ జాన్సన్, బ్రిటన్ ప్రధాని
