ప్రముఖ ఎలక్ట్రానిక్ దిగ్గజ సంస్థ శాంసంగ్ తనను అన్యాయంగా ఉద్యోగం నుంచి తొలగించిందని నిరసిస్తూ ఏడాది కాలంగా 82 అడుగుల ఎత్తున్న టవర్పై నివాసముంటున్నాడు ఓ వ్యక్తి. దక్షిణ కొరియా రాజధాని సియోల్లోని ట్రాఫిక్ కెమెరా టవర్పై శాంసంగ్ బ్యానర్ ప్రదర్శిస్తూ దీక్ష చేస్తున్నాడు.
ఎట్టకేలకు 354 రోజుల తర్వాత శాంసంగ్ సంస్థ క్షమాపణలు చెప్పాక నిరసన ముగించాడు. అగ్నిమాపక సిబ్బంది అతడ్ని టవర్పై నుంచి కిందకు దించారు.
సియోల్లోని శాంసంగ్ కార్యాలయం సమీపంలోని టవర్పై నిరసన చేసిన వ్యక్తి పేరు కిమ్ యోంగ్ హీ(60). ఆ సంస్థలో ఆయన మాజీ ఉద్యోగి. 1995లో కార్మిక సంఘాన్ని ఏర్పాటు చేసేందుకు ప్రయత్నిస్తున్నాడనే ఆరోపణలతో కిమ్ను ఉద్యోగం నుంచి తొలగించింది శాంసంగ్.
బిలియనీర్, శాంసంగ్ వారసుడు లీ జే యోంగ్ ప్రస్తుతం అవినీతి ఆరోపణల కేసులో విచారణ ఎదుర్కొంటున్నారు. సంస్థలో యూనియన్ ఏర్పాటు ప్రయత్నాలు భగ్నం చేసే విధానాలకు స్వస్తి పలుకుతామని గతవారమే ప్రకటించారు.
కిమ్కు కలిగిన నష్టాన్ని, బాధను తగ్గించడానికి తాము మరింత కృషి చేసి ఉండాల్సిందని క్షమాపణలు తెలిపింది శాంసంగ్. అయితే కార్మిక సంఘం ఏర్పాటుకు ప్రయత్నించినందుకే కిమ్ను ఉద్యోగం నుంచి తొలగించారా? అనే విషయంపై మాత్రం స్పష్టత ఇవ్వలేదు.
శాంసంగ్ క్షమాపణలు చెప్పడాన్ని కిమ్కు దక్కిన గౌరవంగా భావిస్తున్నట్లు ఆయన మద్దతుదారులు తెలిపారు.
శాంసంగ్కు, కిమ్కు మధ్య ఏం చర్చ జరిగింది? అతనికి సంస్థ పరిహారాన్ని చెల్లించిందా? లేక ఉద్యోగంలోకి తిరిగి తీసుకుందా? అనే విషయంపై ఇరువురి నుంచి ఏలాంటి స్పష్టత లేదు.
