అఫ్గానిస్థాన్ రాజధాని కాబుల్ మారోమారు పేలుళ్లతో దద్దరిల్లింది. తీవ్ర ఉద్రిక్తతల మధ్య మరో భారీ ఉగ్రకుట్రను అమెరికా సైన్యం అడ్డుకోగలిగింది! కాబుల్ విమానాశ్రయంవైపు దూసుకెళుతున్న ఐసిస్కు చెందిన ఓ వాహనాన్ని వైమానిక దాడులతో ధ్వంసం చేసింది అగ్రరాజ్యం. ఈ నేపథ్యంలో రెండో పేలుడుకు సంబంధించి శబ్దాలు వినిపించాయి. దీంతో ఆ వాహనంలో భారీ మొత్తంలో బాంబులున్నాయన్నది రుజువైందని అగ్రరాజ్యం పేర్కొంది.
"కాబుల్లోని ఓ వాహనంపై అమెరికా భద్రతా దళం.. ఆదివారం సెల్ఫ్ డిఫెన్స్ అన్మాన్డ్ ఓవర్ ది హారిజాన్ వైమానిక దాడులను జరిపింది. కాబుల్ విమానాశ్రయానికి పొంచి ఉన్న ఉగ్రముప్పును తొలగించేందుకే ఈ చర్యలు చేపట్టింది. లక్ష్యాన్ని ఛేదించినట్టు మాకు నమ్మకం ఉంది. అదే సమయంలో ఆ వాహనం నుంచి భారీ పేలుడు శబ్దాలు బయటకు వచ్చాయి. దీంతో ఆ వాహనంలో విస్ఫోటకాలు ఉన్నట్టు స్పష్టమైంది. ఈ పూర్తివ్యవహారంలో పౌరులకు ఏమైనా అయ్యిందా? అనే అంశాన్ని పరిశీలిస్తున్నాము. ఇప్పటివరకు అలాంటి సమాచారం ఏదీ మాకు అందలేదు."
--బిల్ అర్బన్, యూఎస్ సెంట్రల్ కమాండ్ ప్రతినిధి.
అంతకుముందు.. కాబుల్లోనే రాకెట్ దాడి జరిగినట్టు వార్తలొచ్చాయి. విమానాశ్రయానికి వాయువ్య ప్రాంతంలో ఈ ఘటన జరిగినట్టు సమాచారం అందింది. ఇందులో ఓ చిన్నారి మరిణించినట్టు అంతర్జాతీయ మీడియా వెల్లడించింది. అయితే అమెరికా వైమానిక దాడి, రాకెడ్ దాడి ఒకటేనా? లేక రెండూ వేరువేరా? అన్న అంశంపై ఇంకా స్పష్టత లేదు.
మూడోసారి
విమానాశ్రయ ప్రాంగణం బాంబుల శబ్దాలతో దద్దరిల్లడం నాలుగు రోజుల్లో ఇది మూడోసారి. గురువారం విమానాశ్రయం వద్ద ఐసిస్కే ఉగ్ర సంస్థ ఆత్మహుతి దాడులకు పాల్పడింది. ఈ ఘటనలో 180కిపైగా మంది మరణించారు. వీరిలో అమెరికా సైనికులు కూడా ఉన్నారు. ఈ ఘటనకు కచ్చితంగా ప్రతీకారం తీర్చుకుంటామని అమెరికా తేల్చిచెప్పింది. చెప్పినట్టుగానే అఫ్గాన్లో ఐసిస్ బృందంపై శనివారం వైమానిక దాడి జరిపింది.
