'70శాతం మంది మాస్కు వాడితే కరోనా అంతం'

మాస్కుల వాడకంపై ఓ తాజా అధ్యయనం కీలక ప్రకటన చేసింది. బహిరంగ ప్రదేశాల్లో కనీసం 70శాతం మంది మాస్కును ధరించినా.. కరోనా మహమ్మారిని అంతం చేయవచ్చని పేర్కొంది. సర్జికల్​, ఎన్​-95 మాస్కులు మరింత ప్రభావవంతంగా ఉంటాయని వెల్లడించింది.

కనీసం 70శాతం మంది మాస్కులు ధరించినా.. కరోనా మహమ్మారిని అడ్డుకోవచ్చని ఓ అధ్యయనం పేర్కొంది. అయితే మాస్కులు రూపొందించిన పదార్థం, దానిని వాడిన సమయంపై మాస్కు ప్రభావం ఆధారపడి ఉంటుందని స్పష్టం చేసింది.

ఫిజిక్స్​ ఆఫ్​ ఫ్లూయిడ్స్​ జర్నల్​లో ఈ పరిశోధన ప్రచురితమైంది. ఫేస్​ మాస్కులపై ఇప్పటివరకు ఉన్న అధ్యయనాలను పరిశీలించి, ఎపిడెమైలాజికల్​ రిపోర్టులను సమీక్షించి ఈ స్టడీని రూపొందించారు.

"70శాతం ప్రభావవంతంగా పనిచేసే సర్జికల్​ మాస్కులను.. బహిరంగ ప్రదేశాల్లో కనీసం 70శాతం మంది ఉపయోగిస్తే కరోనా మహమ్మారిని అరికట్టవచ్చు. వస్త్రాలతో రూపొందించిన మాస్కును ఎప్పటికప్పుడు ధరించినా వైరస్​ను కట్టడి చేయవచ్చు."

-- శాస్త్రవేత్తలు.

పెద్ద సైజు(5-10మైక్రాన్లు)లోని తుంపర్లు సాధారణమేనని, చిన్న సైజు(5 మైక్రాన్ల కన్నా తక్కువ) తుంపర్లే అత్యంత ప్రమాదకరమని పరిశోధకులు పేర్కొన్నారు. ఈ ఎయిరోసెల్​ సైజు తుంపర్లను సర్జికల్​ మాస్కులు, ఎన్​-95 మాస్కులు మాత్రమే అడ్డుకోగలవని.. వస్త్రాలతో రూపొందించిన మాస్కులు పనిచేయవని వెల్లడించారు.

ఇదీ చూడండి:- 'మాస్కులతో ఊపిరితిత్తులు దెబ్బతినవు'