Chinese Man Bitten by Venomous Snake: మూత బిగించి ఉన్న వైన్ సీసాలో ఏడాదిపాటు పాము బతికే ఉంటుందా? బాటిల్ ఓపెన్ చేసిన వెంటనే ఒక్కసారిగా బయటకు వచ్చి కాటేస్తుందా? అవుననే అంటున్నాడు చైనాకు చెందిన ఓ వ్యక్తి. తన కుమారుడి చికిత్స కోసం కొనుగోలు చేసిన స్నేక్ వైన్ సీసాల విషయంలో ఇలానే జరిగిందని చెబుతున్నాడు.
ఏంటీ స్నేక్ వైన్?: చైనా సంప్రదాయ వైద్యంలో స్నేక్ వైన్ ఎంతో ప్రాచుర్యం పొందింది. దీని తయారీ కోసం.. వైన్ను ఓ సీసా లేదా జార్లో పోసి, అందులో ఓ విషపూరిత సర్పాన్ని పెడతారు. మూతపెట్టి, అనేక నెలలపాటు అలానే వదిలేస్తారు. అలా చేస్తే.. ఆ వైన్ ఔషధంలా మారుతుందని.. రుమాటిసం, ఆర్థరైటిస్, ఫ్లూ వంటి వ్యాధుల నుంచి ఉపశమనం కలిగిస్తుందన్నది చైనీయుల నమ్మకం. చైనా హీలాంగ్జియాంగ్కు చెందిన ఓ వ్యక్తి ఏడాది క్రితం మూడు స్నేక్ వైన్ జార్లు కొన్నాడు. దీర్ఘకాలిక వ్యాధులతో బాధపడుతున్న అతడి కుమారుడి చికిత్స కోసం వాటిని ఉపయోగించాలన్నది అతడి ఆలోచన. అయితే.. కొన్న వెంటనే వాటిని తెరవలేదు. ఎక్కువకాలంపాటు వైన్లోనే పాము ఉంటే.. 'ఔషధ గుణాలు' మరింత బాగుంటాయని వాటిని అలానే వదిలేశాడు. ఇటీవల దాదాపు ఏడాది తర్వాత వాటిని తెరిచాడు. అయితే.. అనూహ్యంగా మూడు జార్లలోని పాములు బతికే ఉన్నాయని చెప్పాడు ఆ వ్యక్తి. వాటిలో ఒకటి తనను కాటేసిందని అన్నాడు. వెంటనే ఆస్పత్రిలో చేరగా.. వైద్యులు చికిత్స అందించి తనను బతికించారని వివరించాడు.
అసలు సాధ్యమేనా?: వైన్ జార్లో ఏడాదిపాటు పాములు బతికే ఉన్నాయన్నదానిపై భిన్నాభిప్రాయాలు వ్యక్తమవుతున్నాయి. గాలి లోపలకు వెళ్లేలాగా జార్ మూత కాస్త తెరిచే ఉంచితే.. ఆల్కహాల్లో పాములు బతికే ఉండగలవని కొందరు అంటున్నారు. కొన్ని జీవుల తరహాలో పాములు కూడా సుప్తావస్థలోకి వెళ్లగలవని.. అప్పుడు వాటికి చాలా తక్కువ మొత్తంలో ఆక్సిజన్ అవసరం అవుతుందని చెబుతున్నారు. సరీసృప జంతుశాస్త్ర నిపుణుడు ఉల్ఫ్గ్యాంగ్ విస్టర్ వాదన మాత్రం మరోలా ఉంది. "ఇది అసాధ్యం. ఆల్కహాల్ వంటి ద్రావణంలో మునిగి ఉన్న ఏ పాము కూడా గంట కన్నా ఎక్కువ బతకలేదు. పాములకు అతీత శక్తులేమీ ఉండవు. అవి కూడా ఇతర జంతువుల్లాంటివే. వాటికి కూడా ఆహారం, నీళ్లు, ఆక్సిజన్ కావాలి." అని వివరించారు ఉల్ఫ్గ్యాంగ్.
ఇవీ చూడండి: తల్లి ఏజ్ 30.. కుమార్తెకు 14.. మనుమడి వయసు?.. ఇదొక క్రేజీ ఫ్యామిలీ స్టోరీ!
మూడో భర్తకు రెడ్‌ హ్యాండెడ్‌గా.. మొదటి ఇద్దరు భర్తలతో ఉండగా..
