భారత్లో ఆక్సిజన్ కొరత వేధిస్తున్న తరుణంలో చైనా ప్రభుత్వ ఆధ్వర్యంలోని సిచువాన్ ఎయిర్లైన్స్ కీలక నిర్ణయం తీసుకుంది. తమ కార్గో సర్వీసులను భారత్కు 15 రోజులపాటు నిలిపివేస్తున్నట్లు తెలిపింది. ఈ నిర్ణయం ద్వారా చైనా నుంచి భారత్కు ఆక్సిజన్ కాన్సంట్రేటర్లు, ఔషధాలు చేరవేయడంలో ప్రైవేటు వాణిజ్యదారులు చేస్తున్న కృషికి అంతరాయం కలగనుంది. అయితే.. అంతకుమందు కరోనాపై పోరాటంలో భారత్కు తాము సహాయ, సహకారాలను అందిస్తామని చైనా ప్రకటించడం గమనార్హం.
చైనా నుంచి భారత్కు నడిచే ఆరు రూట్లను రద్దు చేస్తున్నట్లు పేర్కొంటూ.. సేల్స్ ఏజెంట్లకు సిచువాన్ ఎయిర్లైన్స్ సంస్థ సోమవారం లేఖ రాసింది.
" భారత్లో కరోనా పరిస్థితులు ఆందోళనకరంగా మారిన నేపథ్యంలో.. మన దేశంలో కేసులు పెరగకూడదనే ఉద్దేశంతో.. 15 రోజుల పాటు కార్గో విమానాలను రద్దు చేయాలని నిర్ణయం తీసుకున్నాం. సిచువాన్ ఎయిర్లైన్స్కు భారత్ మార్గం అత్యంత వ్యూహాత్మకమైనది. ఈ రద్దు నిర్ణయం ద్వారా మన సంస్థకు తీరని నష్టం ఎదురువుతుంది. అందుకు మేం క్షమాపణలు కోరుతున్నాం."
- సిచువాన్ ఎయిర్లైన్స్
సిచువాన్ ఎయిర్లైన్స్ తీసుకున్న తాజా నిర్ణయంతో చైనా నుంచి భారత్కు ఆక్సిజన్ను తరలించడానికి ప్రయత్నిస్తున్న వివిధ ప్రైవేటు రవాణాదారులను విస్మయానికి గురి చేసింది. అంతే కాకుండా.. చైనాలోని ఆక్సిజన్ తయారీదారులు.. ధరలను 35 నుంచి 40 శాతానికి పెంచారనే ఫిర్యాదులు వెల్లువెత్తుతున్నాయి.
సరుకు రవాణా ఛార్జీలనూ చైనా ప్రభుత్వం 20 శాతానికి పెంచిందని సినో గ్లోబల్ లాజిస్టిక్స్కు చెందిన సిద్ధార్ధ్ సిన్హా తెలిపారు. సిచువాన్ ఎయిర్లైన్స్ కార్గో విమానాలను రద్దు చేయటం వల్ల భారత్కు ఆక్సిజన్ను సరఫరా చేయడం.. సవాలుగా మారుతుందని చెప్పారు. సింగపూర్ లేదా ఇతర దేశాల మీదుగా వేరే ఎయిర్లైన్స్ ద్వారా భారత్కు రవాణా చేయాల్సి వస్తుందని అన్నారు. దానివల్ల చాలా ఆలస్యమవుతుందని తెలిపారు.
ఇదీ చూడండి: జపాన్ ప్రధానికి మోదీ ఫోన్- కొవిడ్ కట్టడిపై చర్చ
