చైనాను హేళన చేసినా, అణచివేసేందుకు ప్రయత్నించినా చైనీయులు సహించరని హెచ్చరించారు అధ్యక్షుడు జిన్పింగ్. ఒకవేళ ఏ దేశమైనా అందుకు ప్రయత్నిస్తే 140 కోట్ల మంది చైనీయుల బలాన్ని ఎదుర్కోవాల్సి వస్తుందన్నారు. దేశ సార్వభౌత్వాన్ని, ప్రాదేశిక సమగ్రతను కాపాడుకోవాలన్న చైనీయుల సంకల్పాన్ని ఎవరూ తక్కువ అంచనా వేయొద్దని పేర్కొన్నారు. చైనా ఏ దేశాన్నీ లొంగదీసుకోవాలని, అణచివేయాలని ప్రయత్నించలేదని, అదే విధంగా విదేశాలు కూడా చైనాతో మసలుకోవాలని హితవు పలికారు. చైనా కమ్యూనిస్ట్ పార్టీ శతవసంతోత్సవాల సందర్భంగా బీజింగ్లో నిర్వహించిన కార్యక్రమంలో జిన్పింగ్ ఈ వ్యాఖ్యలు చేశారు.
దేశాన్ని కాపాడుకునేందుకు సైన్యాన్ని మరింత పటిష్ఠం చేసుకోవాల్సిన అవసరం ఉందని పేర్కొన్నారు జిన్పింగ్.
'తైవాన్ మాదే'
ఈ కార్యక్రమం సందర్భంగా తైవాన్ వివాదంపై జిన్పింగ్ కీలక వ్యాఖ్యలు చేశారు.
"తైవాన్ను చైనాలో అంతర్భాగం చేసుకోవడం చైనా కమ్యూనిస్ట్ పార్టీ లక్ష్యం. ఇందులో రాజీ పడే ప్రసక్తే లేదు. తైవాన్ స్వాతంత్ర్యం కోసం జరిపే ప్రయత్నాలను పూర్తిస్థాయిలో కట్టడి చేసే విధంగా చర్యలు చేపట్టి.. అందరం కలిసికట్టుగా దేశాభివృద్ధికి కృషి చేయాలి.
చైనా కమ్యూనిస్ట్ పార్టీని ప్రజల నుంచి ఎవరూ వేరు చేయలేరు. అటువంటి ప్రయత్నాలకు కూడా మేము అవకాశం ఇవ్వం."
-జిన్పింగ్, చైనా అధ్యక్షుడు
వందేళ్ల పరిపాలన పూర్తి చేసుకున్న సందర్భంగా చైనా కమ్యూనిస్ట్ పార్టీ గురువారం శతవసంతోత్సవాలను నిర్వహించింది. టియాన్మెన్ స్క్వేర్లో జరిగిన ఈ కార్యక్రమంలో వేల సంఖ్యలో పార్టీ కార్యకర్తలు సహా విద్యార్థులు పాల్గొన్నారు.
ఇదీ చదవండి : 'ఆ టీకాతో పిల్లలకు కరోనా నుంచి రక్షణ!'
