అత్యవసర ప్రజారోగ్య సమస్యలపై ప్రపంచ ఆరోగ్య సంస్థ (డబ్ల్యూహెచ్ఓ) సామర్థ్యం పెంపొందించే సంస్కరణలకు మద్దతిస్తామని చైనా ప్రకటించింది. కరోనా విషయంలో డబ్ల్యూహెచ్ఓతో చైనా సంబంధాలపై విమర్శలు వస్తోన్న నేపథ్యంలో ఈ ప్రకటన ప్రాధాన్యం సంతరించుకుంది.
డబ్ల్యూహెచ్ఓలో సంస్కరణలకు ఐరోపా సమాఖ్య చర్యలు చేపడుతోందని వస్తోన్న వార్తలపై స్పందించింది చైనా. డబ్ల్యూహెచ్ఓ పనితీరు మెరుగుపడేందుకు అవసరమయ్యే సంస్కరణలకు సహకరిస్తామని స్పష్టం చేశారు చైనా విదేశాంగ శాఖ అధికార ప్రతినిధి జావో లిజియాన్.
ఈ నిర్ణయం రాజకీయ కోణంలో చూసేదికాదని.. సైన్స్ను, నిపుణుల ఆలోచనా విధానాలను గౌరవించాలని జావో తెలిపారు. ప్రపంచ ప్రజారోగ్య సమస్యలను కట్టడి చేసే క్రమంలో డబ్ల్యూహెచ్ఓకు మరింత చేయూతనిస్తున్నట్లు పేర్కొన్నారు.
ప్రత్యేకంగా ఓ దేశ రాజకీయ స్వలాభం కోసం ఈ సంస్కరణలకు సహకరించకూడదని, వివిధ దేశాల అంగీకారంతోనే పలు సంస్కరణలు చేపట్టాలని జావో స్పష్టం చేశారు.
డబ్ల్యూహెచ్ఓపై తీవ్ర విమర్శ
కరోనా కట్టడి విషయంలో డబ్ల్యూహెచ్ఓ తీరుపై గతంలోనే తీవ్రంగా మండిపడ్డారు అమెరికా అధ్యక్షుడు డొనాల్డ్ ట్రంప్. సెప్టెంబర్ 23న జరిగిన ఐరాస సర్వసభ్య సమావేశాల్లో డబ్ల్యూహెచ్ఓ చైనా అధ్వర్యంలో ఉందని వ్యాఖ్యానించారు. ఈ మేరకు ఆరోగ్య సంస్థకు ఇకపై నిధులివ్వబోమని గతంలోనే స్పష్టం చేశారు ట్రంప్.
మరోవైపు, చైనాలోని ఏ ప్రాంతంలో వైరస్ పుట్టిందన్న దానిపై పరిశోధన చేసేందుకు ఆరోగ్య సంస్థ సర్వసన్నద్ధమవుతోంది. ఈ మేరకు ఓ శాస్త్రవేత్తల బృందాన్ని కూడా ఏర్పాటు చేసింది. కానీ, చైనా ఈ చర్యకు ఇంకా అనుమతి ఇవ్వాల్సి ఉంది.
ఇదీ చదవండి:కుల్భూషణ్ మరణశిక్షపై పాక్ కీలక నిర్ణయం
