ప్రపంచంలోనే అధిక జనాభా కలిగిన చైనాలో.. జనాభా పెరుగుదల క్రమక్రమంగా సున్నాకు సమానంగా చేరుకుంటోంది. అతి తక్కువ మందికి పిల్లలు ఉండడం కారణంగా ఈ దశబ్దంలో వృద్ధి రేటు సున్నాకు దగ్గరైందని ప్రభుత్వం ప్రకటించింది. పెరిగిపోతున్న వృద్ధులతో కార్మికశక్తి తగ్గిపోతుందని వివరించింది.
గడిచిన పదేళ్ల కాలంలో 7కోట్ల 20 లక్షల మంది పుట్టగా.. దీంతో మొత్తం జనాభా 141 కోట్ల 10 లక్షలకు చేరిందని ఆ దేశ జాతీయ గణాంకాల సంస్థ వెల్లడించింది. అయితే వార్షిక వృద్ధిరేటు 0.53 శాతానికే పరిమితమైనట్లు పేర్కొంది. గత దశాబ్దంతో పోల్చుకుంటే చాలా తక్కువ నమోదు కావడం గమనార్హం.
పెరిగిపోతున్న జనాభా కట్టడికి చైనా నాయకులు 1980 నుంచి సంతానంపై పరిమితులు, ఆంక్షలు విధిస్తూ వచ్చారు. కానీ ప్రస్తుతం ఉన్నవారు మరికొన్నేళ్లలో వృద్ధులు అవుతారు. దీంతో సంపన్న ఆర్థిక వ్యవస్థను సృష్టించే ప్రయత్నాలకు సరిపడా శ్రమిక శక్తి లేకపోడం నాయకులకు ఆందోళన కలిగిస్తోంది.
జనాభా ఆంక్షలను ప్రభుత్వం సడలించినప్పటికీ.. పెరిగిన ఖర్చులు, ఇరుకు గదులు, నిరుద్యోగ సమస్య వంటి వాటితో ఎన్నో జంటలు స్వచ్ఛందంగా పిల్లలను కనడానికి మొగ్గుచూపడం లేదని నిపుణులు అంటున్నారు.
ఇదీ చూడండి: 'వారిలో టీకా పనితీరు తక్కువే'
