18 విమానాలతో చైనా విన్యాసాలు​.. అమెరికాకు హెచ్చరిక?

తైవాన్​​ సమీపంలోని గగనతలంలో చైనా ఆర్మీకి చెందిన 18 యుద్ధ విమానాలు శుక్రవారం చక్కర్లు కొట్టడం కలకలం రేపింది. అమెరికా రాయబారి పర్యటనకు స్పందనగానే.. డ్రాగన్​ దేశం ఈ సైనిక విన్యాసాలు​ చేపట్టినట్లు తెలుస్తోంది. ముందునుంచే తైవాన్​ను తమ భూభాగంగా పేర్కొంటోంది చైనా.

తైవాన్​తో అగ్రరాజ్యం అమెరికా సంబంధాలు మెరుగుపరుచుకోవడంపై కన్నెర్ర జేస్తోంది చైనా. శుక్రవారం చైనా ఆర్మీకి చెందిన 18 యుద్ధ విమానాలు.. తైవాన్​ సమీపంలో చక్కర్లు కొట్టడం కలకలం రేపాయి. అమెరికా రాయబారి పర్యటనకు స్పందనగానే ఈ సైనిక విన్యాసాలు చేపట్టినట్లు తెలుస్తోంది.

నెల వ్యవధిలోనే రెండో పర్యటన...

తైవాన్​కు మద్దతుగా నిలుస్తోన్న అమెరికా.. ఆ దేశంతో సంబంధాల బలోపేతానికి చర్యలు చేపట్టింది. నెల రోజుల వ్యవధిలోనే రెండో అత్యున్నత స్థాయి పర్యటన చేపట్టింది. తాజాగా అగ్రరాజ్యం విదేశాంగ శాఖ సహాయ మంత్రి, ఆర్థికవృద్ధి, విద్యుత్తు​, పర్యావరణ శాఖలను చూస్తోన్న కీత్​ క్రాచ్​.. తైవాన్​లో పర్యటిస్తున్నారు. శుక్రవారం ఆ దేశ ఉప ప్రధాని, ఆర్థిక వ్యవహారాల శాఖ మంత్రులతో ప్రత్యేకంగా సమావేశమయ్యారు. అనంతరం పారిశ్రామికవేత్తలతోనూ భేటీ అయ్యారు క్రాచ్​. ఈ రోజు రాత్రి అధ్యక్షుడు సాయ్​ ఇంగ్​-వెన్​తో డిన్నర్​ చేయనున్నారు. శనివారంతో ఆయన పర్యటన ముగియనుంది.

క్రాచ్​ పర్యటనకు స్పందనగానే...

తైవాన్​కు అమెరికా మద్దతు ఇవ్వటాన్ని తీవ్రంగా వ్యతిరేకిస్తోంది చైనా. క్రాచ్​ పర్యటనకు స్పందనగానే.. చైనా ఆర్మీకి చెందిన తూర్పు కమాండ్​ దళాలు తైవాన్​కు సమీపంలో సైనిక డ్రిల్​ నిర్వహించాయి. తైవాన్ స్వయం​ ప్రతిపత్తి మద్దతుదారులను భయపెట్టటమే లక్ష్యంగా.. ఈ నెలలోనే రెండోసారి యుద్ధ విన్యాసాలు చేపట్టింది చైనా.

ప్రస్తుతం తైవాన్​ సమీపంలో చేపట్టిన సైనిక డ్రిల్​ను సమర్థించుకుంది చైనా. జాతీయ సార్వభౌమాధికారం, ప్రాదేశిక సమగ్రతను కాపాడటానికి ప్రయత్నిస్తామని చెప్పారు చైనా రక్షణ మంత్రిత్వ శాఖ ప్రతినిధి రెన్​ గుయోకియాంగ్​. ఇందులో భాగంగానే తైవాన్​ జలసంధి అంతటా ప్రస్తుత పరిస్థితులకు ప్రతిస్పందనగానే చట్టబద్ధమైన, అవసరమైన చర్యలు తీసుకున్నామని పేర్కొన్నారు. అమెరికా, తైవాన్​ అధికార పార్టీ మధ్య ఇటీవల సంబంధాలు మెరుగయ్యాయని అభిప్రాయపడింది.

తైవాన్​ గగనతలంలోకి చైనాకు చెందిన రెండు బాంబర్స్​, 16 యుద్ధ విమానాలు వచ్చినట్లు తైవాన్​ రక్షణ శాఖ వెల్లడించింది. వాటి కదలికను గుర్తించిన వెంటనే తమ యుద్ధ విమానాలను రంగంలోకి దించినట్లు తెలిపింది.

ట్రంప్​ వ్యూహంలో భాగంగానే..

1979 తర్వాత.. తైవాన్​లో అమెరికా ఉన్నతస్థాయి అధికారి పర్యటించటం ఇది రెండోసారి. గత ఆగస్టులో అగ్రరాజ్యం ఆరోగ్య మంత్రి అలెక్స్​ అజర్​ పర్యటన తర్వాత.. తాజాగా అమెరికా అధికారి క్రాచ్ తైవాన్​లో అడుగుపెట్టారు. తైవాన్​తో సంబంధాలను బలోపేతం చేయాలనే ట్రంప్​ పరిపాల విభాగం వ్యూహంలో భాగంగానే ఈ పర్యటనలు కొనసాగుతున్నాయి. అంతర్జాతీయ సంస్థల్లో తైవాన్​ భాగస్వామ్యం పెంపు, ఆయుధాల విక్రయాలు వంటి అంశాల్లో మద్దతు ఇస్తోంది అగ్రరాజ్యం.

ఇదీ చూడండి: 'అమెరికా... నిప్పుతో గేమ్స్‌ వద్దు'