చనిపోయాక తన కుటుంబసభ్యులు ఎప్పటికీ తను లేనని బాధపడకూడదని ఓ తండ్రి తపన పడ్డాడు. చనిపోతానని తెలిసిన తర్వాత కుటుంబసభ్యులకు మరిచిపోలేని జ్ఞాపికను అందించాలనుకున్నాడు. తన మాటలను రికార్డు చేయించి ఓ అత్యాధునిక స్పీకర్ తయారు చేయించాడు. ఈ స్పీకర్ను తన కొడుక్కు జ్ఞాపికగా అందించాడు.
చైనా హెనాన్ రాష్ట్రానికి చెందిన వాంగ్ యూకు ఊపిరితిత్తుల క్యాన్సర్. చివరి రోజుల్లో శ్వాస పీల్చుకునేందుకు ఇబ్బందిగా ఉన్నా... దృఢ సంకల్పంతో తన మాటలు రికార్డు చేయించిన ఓ స్పీకర్ను సిద్ధం చేయించాడు వాంగ్ యూ.
దూరంగా వేరే పట్టణంలో చదువుకుంటున్న తన కొడుకు పుట్టిన రోజున వెళ్లి ఈ స్పీకర్ ను బహుమతిగా అందించి ఆశ్చర్యపరిచాడు.
'నేను ఈ లోకాన్ని వీడినా...నాకు నీతో మాట్లాడుతున్నట్లే అనిపిస్తుంది' అంటూ.. తానెంతో శ్రమించి తయారుచేయించిన స్పీకర్ను కొడుక్కు బహుమతిగా ఇచ్చాడు.
అదే రోజు వాంగ్ భార్య తన డైరీలో ఒక సందేశం రాశారు. "మీ నాన్న ఏదో ఒకరోజు నిన్ను వీడిపోయాక.. ఈ స్పీకర్తో మాట్లాడు. అది నీ మాటలు వింటుంది. నీకు సమాధానం ఇస్తుంది. కన్నా... నీ నాన్న గొంతు గుర్తుపెట్టుకో. ఎంతగా అంటే తను నిన్ను వీడిపోలేదు అన్నంతగా.." అనేదే ఆ సందేశం.
అనంతరం కొన్ని నెలల తర్వాత క్యాన్సర్తో పోరాడుతూ గతేడాది డిసెంబరులో తుది శ్వాస విడిచాడు వాంగ్యూ. వాంగ్ యూ భౌతికంగా ఈ లోకంలో లేక పోయినా, తన మాటలతో కుటుంబసభ్యులకు మానసికంగా చేరువగానే ఉన్నాడు.
చైనావ్యాప్తంగా నిర్వహించే 'టూంబ్ స్వీపింగ్ ఫెస్టివల్'లో చనిపోయిన తమ కుటుంబ సభ్యులను స్మరించుకుంటారు. వారి సమాధుల వద్ద ప్రత్యేక ప్రార్థనలు నిర్వహిస్తారు. తమ ఆప్తులను తలచుకుని కన్నీటి పర్యంతమవుతారు. వాంగ్ కుటుంబానికి అరుదైన జ్ఞాపిక మూలంగా ఆ దుఃఖం తగ్గింది.
ఇదీ చూడండి: కృత్రిమ మేధతో 'రోబో సైనికులు' వస్తున్నారు!
