పుల్వామా ఉగ్రదాడి అనంతరం భారత్-పాకిస్థాన్ మధ్య ఉద్రిక్త పరిస్థితులు నెలకొన్నాయి. ఇరుదేశాల మధ్య సంబంధాల పునరుద్ధరణకు, చర్చల ద్వారా సమస్య పరిష్కరించే ప్రయత్నాలకు చైనా మద్దతు ఇచ్చిందని పేర్కొన్నారు ఆ దేశ విదేశాంగ శాఖ మంత్రి వాంగ్ యీ. ఈ విషయంలో తెరవెనుక నుంచి బీజింగ్ చేపట్టిన చర్యలను నొక్కి చెప్పారు.
చైనా 2019 దౌత్య విజయాలపై అధికార కమ్యూనిస్ట్ పార్టీ వార్తాసంస్థ పీపుల్స్ డెయిలీకి ఇచ్చిన ఇంటర్వ్యూలో పుల్వామా అనంతరం భారత్-పాక్ల మధ్య ఉద్రిక్తతలు తగ్గించేందుకు బీజింగ్ చేసిన కృషిని ప్రస్తావించారు వాంగ్.
"భారత్-పాక్ల మధ్య ఉద్రిక్తతను తగ్గించే ప్రయత్నాలకు చైనా మద్దతు పలికింది. ఇరు దేశాల మధ్య వ్యత్యాసాలను చర్చల ద్వారా పరిష్కరించేందుకు కృషి చేశాం. ఈ ఏడాది పోరుగు దేశాలతో దౌత్య విషయంలో చాలా ముఖ్యాంశాలు ఉన్నాయి. మొదటగా పొరుగు దేశాలతో అన్ని విధాలుగా సంబంధాల బలోపేతం చేపట్టాం. చెన్నైలో ప్రధానమంత్రి నరేంద్ర మోదీ, అధ్యక్షుడు షి జిన్పింగ్ల మధ్య రెండో సమావేశం విజయవంతమైంది. భారత్-చైనా సంబంధాల బలోపేతంపై చర్చించారు. పరస్పర సహకారంపై పలు ఒప్పందాలు కుదుర్చుకున్నారు."
- వాంగ్ యీ, చైనా విదేశాంగ మంత్రి.
2020ని 'భారత్-చైనా సంస్కృతి, ప్రజాసంబంధాల మార్పిడి సంవత్సరం'గా ఉత్సవాలు నిర్వహించాలని నిర్ణయించినట్లు తెలిపారు వాంగ్. ఇరు దేశాల మధ్య సంబంధాలు ఏర్పడి 70 ఏళ్లు పూర్తవుతున్న సందర్భంగా 70 కార్యక్రమాలు చేపట్టేందుకు చర్యలు చేపట్టామన్నారు.
జమ్ముకశ్మీర్ పుల్వామాలో సీఆర్పీఎఫ్ కాన్వాయ్పై జరిగిన ఉగ్రదాడిలో 40 మంది జవాన్లు ప్రాణాలు కోల్పోయారు. దీనికి ప్రతీకారంగా పాక్ బాలాకోట్లోని ఉగ్రస్థావరాలపై వైమానిక దాడి చేసింది భారత్. ఫిబ్రవరి 27న పాక్ యుద్ధవిమానాలు భారత భూభాగంలోకి ప్రవేశించాయి. వారిని తిప్పికొట్టే ప్రయత్నంలో భారతీయ వైమానిక దళ విమానం పీఓకేలో కూలిపోయింది. పైలట్ను అదుపులోకి తీసుకున్నాయి పాక్ బలగాలు. అయితే.. వెంటనే పైలట్ను విడుదల చేస్తామని ప్రకటించిన పాక్ అనంతరం భారత్కు అప్పగించింది.
ఇదీ చూడండి: కశ్మీర్లో బలగాల ఉపసంహరణకు కేంద్రం నిర్ణయం
